Pinerluuteqarsimasut Sisimiut kommuniani sulisinnaanngorput

Pineqaatissinneqarsimasut kommunimi sulisorineqarsinnaannginnerat pineqaatissinneqarsimasunut pineqaatisseeqqinnertut taasariaqarpoq, Sisimiut aviisiat Sivdleq sapaatip akunnera kingulleq saqqummersoq taamatut allaaserisaqarpoq.

Sisimiut kommuniata suliffeqarfiutaasa kissaateqarnerat aallaavigalugu pineqaatissinneqarsimasunik sulisoqarsinnaanermi maleruagassat qasukkartinneqarput.

Meeqqat atuarfiini eqqiaasutut sulisorineqarsinnaanerat kissaatigineqartut ilagaat, kisiannili meeqqat atuareernerisigut sulisorineqarsinnaannerat kissaatigineqarluni.

- Sulisunik amigaateqartilluta pinerluuteqarsimallutik pineqaatissinneqarsimasunik sulisussarsisinnaannginnerput ilumoorsinnanngilaq, Morten Siegstad, Siumut sinnerlugu kommunalbestyrelsimi ilaasortaq, oqarpoq.

- Suna pillugu pineqaatissinneqarsimanersut eqqumaffigineqartariaqarpoq, meeqqanik kinguaassiuutitigut atornerluisimasoq meeqqanut paaqqinnittarfinni, atuarfinni timersortarfinniluunniit sulisussarsiarineqartariaqanngilaq, Morten Siegstad aviisimi Sivdleq-mi apersorneqarluni oqarpoq.

Pineqaatissinneqarsimasut kommunimi sulilernissaat sioqqullugu nalilersorneqartassasut, aviisi Sivdleq taama allaaserisaqarpoq.