Pinerluuteqarsimasut inissiisarfiugallartumiitsinneqartut ikiliartupiloorput
- Kangerlussuarmi inissiisarfiugallartumiitsinneqartut ukioq manna juulip qaammataani pineqaatissinneqarnerminnik naammassinnereersimassasut ilimagaarput, pinerluuteqarsimasut inissinneqartarfiannut inissinneqartussat pillugit ajornartorsiut qaangerneqassagunarluni, pinerluuteqarsimasunik nakkutilliisoqarfimmeersoq radioaviisimut oqarpoq.
Pinerluuteqarsimasut inissinneqartarfiannut inissinneqarnissaminnik utaqqisut ukiup massuma aallartinnerani 261-iugaluarput, maannalu 50-iinnanngorlutik.
Pinerluuteqarsimasutut eqqartuunneqarsimasut Kangerlussuarmi takuneqarsinnaalernerat Kangerlussuarmi innuttaasunit aalassassimaarutigineqaraluarpoq.
Inatsiseqarnermut ministereqarfiup immikkut ittumik aningaasaliineratigut Kangerlussuarmi pinerluuteqarsimasunik inissiisarfiugallartoq ammarneqarpoq.
Inissiisarfik ajornartorsiutitaqanngitsumik ingerlanneqarpoq, inissinneqarsimasut innuttaasullu akornanni ajornatorsiortoqarsimanani.
Pinerluuteqarsimasutut inissiisarfiugallartup siunissaa pillugu suli aalajangiisoqanngilaq, matoqqasumilli Nuummi inissiisarfeqalernissaq aalajangiunneqareerpoq, pinerluuteqarsimasunut inissiisarfik maanna atorneqartoq allilerneqarneratigut tamanna siunniunneqarluni.
Pinerluuteqarsimasunut Inissiisarfik anginngitsoq Tasiilami inissinneqartussatut.