Pinerluuteqarsimasut affai pinerloqqittarput
Pinerluuteqaqqittartut inuttut ajornartorsiuteqartarput, soorlu imigassamik ikiaroornartumillu atornerluisuusarlutik, inatsisilerituup oqaatigaa.
Pinerluuteqaqqittartullu pinerluuteqarsimasunut Nuummi inissiisarfimmi takussaapput.
Nuummi pinerluuteqarsimasunut inissiisarfimmi pineqaatisinneqarsimasut maanna 70-it tungaanut amerlassusillit isersimapput. Taakkualu akornaniipput pinerluuteqaqqittartut. Pinerluuteqarsimasutut inissineqarsimasup Agpâraq Høeghip pinerluuteqaqqittartut takusarpai.
-Tassa taanna misilinnikuunagu isinik nammineq takullugu tupinnaqaaq. Maani isersimanerinnanni immaqa inunnik 15-inik kammalaatitaarpunga. Tamarmik iperagaanikuupput, kisianni tamarmik aamma uteqqereerput, Agpâraq Høegh oqarpoq.
Poul Olsen maannakkut 30-nik ukioqartoq arfineq marloriarluni pinerloqqittareerpoq. Pinerlunnermut naatsorsueqqissaarnermik kisitsisit takutippaat inuusuttut 15-it 35-llu akornanni ukioqartut pinerloqqittartuunerusartut.
-Maannakkut inuusuttut isersimasartut tarrarsorfigisaqaakka. Uattoqissaaq iliuuseqarnikut uattoqqissaaq sussanerlutik nalugaat. Amilaarnartumik takusinnaareertarpara suli 30-inik ukioqalinngikkarlulutik aatsaat aallarnisartut, tassa ikiorneqarnissamik pisariaqartitsisut, Poul Olsen oqarpoq. Taanna aperineqarami pinaveersaartitsineq amigaataanersoq, ima akivoq
- Aap, taama oqaatigisinnaavara. Ilaa sullisseriaaseq maani Anstaltimi equngasorujussuuvoq.
Inatsisileritooq Gedion Jeremiassen ukiuni 20-ni eqqartuussivimmi illersuisartuunermini pinerloqqittartut naapittarpai. Pinerloqqittartullu assigiinngitsunik ajornartorsiuteqartarnerarpai.
- taamatut utikattartut amerlanersai, imigassamik ikiaroornartumillu annertuumik ajornartorsiuteqareertarput, namminneq aqussinnaajunnaariikkaminnik. Taamatullu aamma aningaasaqarniarnermikkut ajornartorsiuteqareerlutik, tamakkulu tunngavigalugit ineqarnermikkut ajornartorsiuteqartarlutik. Ilaatigut amerlasuut aqqusiniinnarmi inuusarput. Inissiaqarsimagunaraluarlutik anisitaanikut, Gedion Jeremiassen oqarpoq.