Pinerluuteqarsimasunut inissiisarfimmiit qimaasut utereerput
Kingulliit sapaatip-akunnera qimaaqqareerlutik maanna tigusaasimalersut, Nuummi politeeqarfiup pisortaa Bent Heiselberg oqarpoq.
Hansinnguaq Olsvig tallimanngormat novembarip arfineq-pingajuata unnuaani inissiisarfimmut uterpoq, Hans Jørgen Heinrichilu ataasinngornerup ullaassaani uterluni.
- Marluullutik maanna pinerluuteqarsimasunut inissiisarfimmeeqqilerput. Namminnerlu sumiinnertik nalunaarutigaat, Bent Heiselberg ilisimatitsivoq.
Nuummi politeeqarfiup pisortaata ilanngullugu nalunaarutigaa, sapaatip akunnerata ingerlanerani arlalinnik suliassaqarsimallutik. Angerlarsimaffinni eqqissiviilliornerit sisamat orniguffigisimavaat. Aamma aalakoortut marluk, aqqusinermilu eqqissiviillionerit tallimat orniguffigineqartariaqarsimapput.
Sisamanngormat angut inuusuttoq 19-inik ukiulik biilinik attartukkaminik pingasunik ilaasoqarluni ajutoorpoq, marluk nakorsiartariaqarsimallutik.
Aamma pisiniarfinni tillinniarnerit tallimat biilinillu aserorterinerit sisamat Nuummi politiit suliassaasa ilagisimavaat.
