Pinerluuteqarsimasunut inissiisarfimmi sulisut PTSD-mik eqqugaasartut ikinnerusut
Nunatsinni pinerluuteqarsimasunut inissiisarfinni arfinilinni sulisut ikinnerusut sakkortuumik pisoqarneranik nalaassisimasut piffissami sivisunerusumi tarnikkut qisuariaateqartarput.
Danmarkimi atugarissaarneq pillugu ilisimatusarfimmit misissuiffiusartumiillu – VIVE-mit nalunaarusiap nutaap tamanna takutippaa.
Assersuutigalugu pinerluuteqarsimasunut inissiisarfimmi sulisunit qulinit ataaseq PTSD-mik ersiuteqarpoq – 2020-mi kisitsit taanna sulisut sisamararterutaanniippoq. Nakkutilliisut uippakajaarnermik, annilaanganermik isumatsassimaarnermillu nalaataqartut amerlassusaat ukiut ikittut ingerlaneranni ikilipput.
AAMMA ATUARUK Kattuffik: Pineqaatissinneqarsimasunut inissiisarfinni nakkutilliisussaaleqineq ajornartorsiutaajunnaarpoq
Tamanna Kalaallit Nunaanni Pinerluttunik Isumaginnittoqarfimmi pisortaanerugallartup, Christian Høygaardip nuannaarutigaa.
2020 sioqqullugu aningaasarsiat nallersuunnerat:
- Pineqaatissinneqarsimasunut nunatsinni inissiisarfimmi ukiut marluk tungaannut nakkutilliisoq tapisiat aalajangersimasut ilanngullugit 19.365 koruuninik qaammammusiaqarpoq.
- Danmarkimi parnaarussivimmi ukiut marluk tungaannut nakkutilliisoq tapisiat aalajangersimasut ilanngullugit 24.769 koruuninik qaammammusiaqarpoq.
- Nikingassut 5400 koruuniuvoq.
- Nunatsinni nakkutilliisut sapaatit akunnerannut 40 tiimit sulisarput. Danmarkimilu nakkutilliisut sapaatit akunnerannut 37 tiimit sulisarlutik.
- Folketingimi amerlanerussuteqartut 2019-imi akuerisaannik nunatsinni nakkutilliisut tapisiaannik nalimmassaanissamik 2023-p tungaanut atuuttumik isumaqatigiissusiortoqarpoq. Nunatsinni nakkutilliisut taamaalillutik Københavnimi parnaarussivimmi nakkutilliisutulli akissarsiaqalerput.
- Aningaasat 2023 ilanngullugu akissarsianik qaffaataasut - nunatsinni nakkutilliisunut 38,4 millionit koruunit politiinullu 10,8 millionit koruunit - Atlantikup Avannaamiunut aningaasaliissutineersuupput.
Aallerfik: Pinerluttunik Isumaginnittoqarfik, inatsiseqarnermut ministereqarfik
- Sulinermi avatangiisit suliffeqarfimmi pingaaruteqarnerpaat ilagaat. Taamaattumik ataatsimoorluta nakkutilliisutsinnut, inissiisarfimmiittunik ulluinnarnik pingaaruteqartumik suliaqartunut pitsaanerusunik sinaakkutissaqalersitsinerput nuannaarutigilluinnarpara.
Ilinniarsimasut amerlanerusut nalaatsinerlunnermut aaqqiissutit pitsaanerusut
Nunatsinni pinerluuteqarsimasunut inissiisarfinni nakkutilliisut pingaartumik pinerluuteqarsimasunut nakkutilliisutut ilinniarsimasut amigaataanerat ukiorpassuarni ilungersuutigineqarpoq.
Naalagaaffimmiilli pinerluuteqarsimasunut inissiisarfimmi nakkutilliisut akissarsiaqarnerulernissaannut 2020-mi 40 millionit koruuninik immikkoortitsisoqarpoq aningaasallu pinerluuteqarsimasunut inisiissarfimmi nakkutilliisunngorniartut amerlanerulernissaannut aamma atorneqartussaapput.
Tamatuma saniatigut nunatsinni pinerluttunik isumaginnittoqarfiik pinerluttunik isumaginnittoqarfimmi nakuusernernik, siorasaarinernik imminut toqoriaraluartunik nalaatsisimasunut ilaatigut oqaloqatiginninnernik tarnip pissusianik ilisimasalimmik ikiuinernik ukkatarinnissimavoq.
AAMMA ATUARUK Parnaarussiviit kattuffiat: Nakkutilliisunut isumaqatigiissut pisariaqartinneqarpoq
Tamannalu sunniuteqarsimarpasittoq, Danmarkimi Pinerluttunik Isumaginnittoqarfiup pisortaa, Ina Eliasen oqarpoq.
- Kalaallit Nunaanni suliffimmi avatangiisinik pitsanngoqangaatsiarnerata toraagalimmik anguniagaqarnerit attassinerillu sunniuteqarsimasut takutippaa. Tamanna Pinerluttunik Isumaginnittoqarfiup sulisussarsiorneranut sulisunillu attassiniarneranut suliffiup isumannaatsuunissaanut toqqissisimanartuunissaanullu pingaaruteqarluinnarpoq.
Suliffimmili avatangiisit suli pitsaanerungaatsialersinnaasut, nalunaarusiami inerniliissummi allassimavoq.
-
Pinerluttunik Isumaginnittoqarfiani nakkutilliisutut misiliummik atorfillit 46.800 koruunit missaannik akileraannginnermi ukiumut isertitaqarnerulernikuupput.
-
Nakkutilliisutut aalajangersimasumik atorfillit - nakkutilliisutut ukiuni qassini atorfeqarsimanersut apeqqutaalluni 70.000 koruunit 85.000 koruunillu akornanni akileraannginnermi ukiumut isertitaqarnerulernikuupput.
