Pinerluuteqarsimasunut inissiisarfik ulikkaaqqajuarpoq
Inissaqannginneq pissutigalugu pinerluutillit inimi ataatsimi marlukkaarlugit inissinneqartariaqartarput. Inissinneqarsimasut amerlanerat pissutigalugu sulisut ulapinnerupput, Ilulissani pinerluuteqarsimasut inissiisarfiata ittua, Peter Abelsen-Petersen oqarpoq.
- Isertitsivinniittut amerlavallaarnerisa kinguneranik sulisut ulapinnerulersarput, isertitsivimmiittullu eqqissiviilliorneranni taakku eqqissisarnissaat ajornarnerulersarluni, Ilulissani isertitsiviup ittua, Peter Abelsen- Petersen oqarpoq.
Ilulissani isertitsiviup ulikkaaqqajuarneranut pissutaasunut ilaavoq, Folketingimip ombudsmandiata ukiut marlussuit matuma siorna piumasarimmagu, tigummigallagassat ingerlaannartumik isertitsivinniittalissasut. Ilulissat isertitsivianni tigummigallakkat maanna qulit missaanniipput, taakkulu immikkut sullitassaallutik.
- Pinerluuteqarsimasut inissiisarfiinut pinerluuteqarsimasut ingerlaannartumik inissinneqartarnissaannik aalajangiinerup kingorna inissiisarfiit ulikkaaqqajualernikuupput, tamatumalu kingunerisaanittaaq tigummigallagassat amerlikuupput, taakkulu sivisuumik tigummigallagassaasarlutik, taakkulu tassa ulapinnerulernitsinnut pissutaanerullutik, Peter Abelsen-Petersen oqarpoq.
Isertitsivinniittussatut eqqartuunneqartut utaqqisut allattorsimaffiannut allanneqartarput, taakkulu piaartumik isertitsivinniilernissaat piumasaqaataalluni, tamannali ajornakusoorsinnaasartoq, Peter Abelsen-Petersenip oqaatigaa.
- Pinerlussimasut inissinneqarnissaannut utaqqisut allattorsimaffiat Nunatsinni tamarmut atuuppoq, qullersaqarfiullu aalajangersimappagu pinerlussimasoq Ilulissaniissasoq, tamanna itigartissinnaanngilarput. Pinerluuteqarsimasunulli inissiisarfiit Nunatsinniittut tamarmik ulikkaaqqajuarnerisa pilersitaanik utaqqisut amerlisimapput. Ilulissani pinerluuteqarsimasut isertitsivianni ittoq, Peter Abelsen-Petersen taama oqarpoq.
Ilulissani isertitsivimmi sulisut maanna aqqaniliupput, marlukkaarlutillu 24 tiimit sulisarlutik. Ilulissani isertitsivik allilerneqartussaasoq Peter Abelsen-Petersenip aamma oqaatigaa, neriuutigalugu tamatuma kinguneranik utaqqisut ikiliumaartut.