Pinerluuteqarsimasunut inissiisarfik inuusuttuaqqanut naleqqutinngilaq
Inuusuttuaqqat pineqaatissinneqarsimasut immikkut isumannaallisakkanik ulloq unnuarlu paaqqinnittarfinniitinnagit pinerluttut inersimasut akornanni isertitsivinnut inissinneqaannartarneri pillugit Aleqa Hammond-ip paragraf 37 naapertorluguapeqquteqaataanut Mimi Karlsen-ip akissutaa Aaja Chemnitz Larsen-ip quarsaarutigaa.
- Inuusuttuaqqanut pineqaatissinneqarsimasunut immikkut isumannaallisakkamik ulloq unnuarlu paaqqinnittarfiliorniarneq Naalakkersuisuusugut suli siunniuteqqavarput, Mimi Karlsen, tusagassiutinut nalunaarummi ilaatigut taama allappoq.
Mimi Karlsen-illu tusagassiutinut nalunaarutaa naapertorlugu inuusuttuaqqat kommunini tamalaaneersut pineqaatissinneqaraangamik taakku kommuniminni immikkut ittumik suliniuteqarfigineqarnissaat neqeroorutigineqartarsimagaluarpoq. Neqeroorutaasartorli tamatigut itigartinneqartarsimavoq, ilaatigut kommunip suliniummut akissaqannginnera pissutaatinneqartarsimanngikkuni, Pinerluuteqarsimasunut Isumaginnittoqarfiup tamanna isumagissagaa tunngavilersuutigineqartarsimammat.
- Tamanna soorunami naammaginanngilaq. Eqqartuussiviummi aalajangiinera naapertorlugu inuusuttuaraq 18-it inorlugit ukiulik inissinneqartussanngorluni pineqaatissinneqaraangat inuusuttuaqqap inissinneqarnissaa inunnik isumaginnittoqarfiup pisussaaffigilertaraluarpaa. Tamatumunngali inatsisit atuuttut pitsaanerpaajunngikkaluartut inuusuttuaqqanut pineqaatissineqarsimasunut sinaakkutissartaasa iluini periarfissat tamaasa atorlugit Naalakkersuisut iliuuseqarniarsariniarput, Mimi Karlsen ilaatigut allappoq, inuusuttuaqqallu pineqaatissinneqarsimasut isumagineqartarnissaanni kommunit Pinerluuteqarsimasunullu isumaginnittoqarfiup qanimut suleqatigiinnerulernissaat tamatuma saniatigut ujartornlugu.