Pinerluuteqarsimasoq ikiorsiinernut akuersaartuaannanngilaq

-Pinerluuteqarsimasup ikiorserneqarnissamut neqeroorut akueriuaannartanngilaa, Kalaallit Nunaanni Pinerluuteqarsimasut inissiisarfiini pisortaq, Peter Jyndevad oqarpoq.

Pinerluuteqarsimasut marluungaangata ataaseq pinerloqqittarpoq. Tamannalu pinerluuteqarsimasup inuiaqatigiinnut uteqqinnissaa anguniarlugu suliniarnerup ajoquteqarneranut takussutissaanngitsoq, Peter Jyndevad isumaqarpoq.

- Pinerluuteqarsimasutut inissinneqarsimasut inuiaqatigiinnut uteqqinnissaat anguniarlugu Pinerluttunik isumaginnittoqarfik kisimi iliuuseqarsinnaanngilaq. Pinerlunnermik pinaveersaartitsiniarneq tassunga killissimappat, taava kingusippallaarpoq. Pinerluuteqareersimagunik kingumut pinerluuteqaqqinnissaat ilimanaateqarsinnaavoq. Tamakkualu Pinerluttunik isumaginnittoqarfiup sullissinerata ajorneranik inernilerneqarsinnaanngilaq, kisianni pikkorinnerulertuaannarsinnaavugut. Pinerluuteqarsimasulli inuiaqatigiinnut iluatsittumik uteqqissappata nukissat sulisussallu apeqqutaalluinnarput, Kalaallit Nunaanni pinerluuteqarsimasut inissiisarfiini pisortaq Peter Jyndevad oqarpoq.

Pinerluuteqarsimasut pineqaatisinneqaraangata inuiaqatigiinnut uteqqinnissaat anguniarlugu iliuuseqartoqaraangat, piumasaqaatinik malitseqartarpoq.

- Misiligummik anisitsisoqaraangat piumasaqaataasarpoq, imigassamik atornerluisoq katsorsarneqassasoq, pineqartumut naleqquttumik angerlarsimaffissaqassasoq kiisalu pinerluttunik isumaginnittoqarfik nakkutilliissasoq, Peter Jyndevad oqarpoq. Nassuiaallunilu pinerluuteqarsimasoq inuiaqatigiinnut iluatsittumik uteqqissaguni, pinerluuteqaqqissanngitsoq. Tamannalu aatsaat nammineq piumassuseqaruni iluatsissinnaasoq.