Pinerluttut ukiup aappa qeqqa tikillugu utaqqisarput

Meeqqanik atornerluisimasut eqqartuunneqarnermi kingorna aneertut siumugassaasarput, Aleqa Hammond ilaatigut danskit ullormut aviisit saqqummersartuisa ilaannut Politiken-imut oqarpoq.

Nunatsinni pinerluuteqarsimasunut isertitsivinnut utaqqisut 175-iupput, qaammatinilu 15-iniit 18-inut utaqqisariaqasallutik. Inatsisinik atortitsinermut naalakkersuisoq Aleqa Hammond Politiken-imut oqarpoq, pinerlunnermi eqqugaasut inatsisit naapertuunnerinik tatiginninnerannut ajoqutaalluinnartoq, eqqugaasullu illersorneqarnissaannut ajoqutaalluinnarluni.

Frank Jensen Socialdemokratit sinnerlugit inatsisit atortinneqarneranut naalakkersuisuusimasoq aviisimut oqarpoq Danmarkimi utaqqisunik ikilisaanissamik anguniagaqarnerup malitsigisariaqanngikkaa Kalaallit Nunaanni immikkut ittumik utaqqisuuteqalernissaq. Frank Jensen nangippoq inuiaqatigiinnguani ingammik malunnassasoq pinerlussimasut aqqusinerni siumorsinnaanerisa misigissutsikkut annernarluinnarsinnaanera.

Aleqa Hammond sapaatip-akunnerani tulliuttumi danskit inatsisit atortinneqarnissaannut naalakkersuisumik Lene Espersen-imik ataatsimeeqateqassaaq.