Pinerluttut tattoqisaapput
Taassuma pineqaatissinneqarsimasunut inissiisarfimmut sapaatip akunnerani kingullermi pulaarnermini, pineqaatissinneqarsimasut mattusimaneqartut maluginiarluarpai.
- Pineqaatissinneqarsimasut ineeqqanut kisimiitillugit inissinneqartarnerat, mattussinerunngitsutut taaniarneqarmat, tamanna takujuminaatsippara. Taakkumi pineqaatissinneqarsimasunik allanik sammisaqaqateqarnissamut killilerujussuarmik periarfissaqarput, tamannalu isornartorujussuuvoq, Sara Olsvig oqarpoq.
Ilisimatuutut misissuisimasumit Annemette Nyborg Lauritsenimit aamma eqqartuussissuserisumit Finn Meinelimit, pineqaatissinneqarsimasunut inissiisarfimmi ineeqqanut mattussisarneq qanittukkut sakkortuumik isornartorsiorneqarpoq, pissutsillu taamaannerat taakkua pinerluttunut isumaginnittoqarfimmut naammagittaalliuutigaat.
Sara Olsvig aamma isumaqarpoq, Nuummi pineqaatissinneqarsimasunut inissiisarfimmi ima inissakilliortoqartigisoq, qanoq iliuuseqarnissamut matoqqasumik parnaarussiviliornissaq utaqqeqqaarneqartariaqarani.
- Nuummi pineqaatissinneqarsimasunut inissiisarfimmi aamma Nunatsinni pineqaatissinneqarsimasunut inissiisarfinni allani pissutsit pitsanngoriartinnissaannut maanna amerlanerusunik aningaasaliisoqartariaqarpoq. Pineqaatissinneqarsimasut inuiaqatigiinni inooqataaleqqinnissamut aamma ilinniagaqarnissamut naammattunik periarfissaqannginnerat, kialuunniit akuersaarsinnaanngilaa, ajornartorsiutillu tamakku iliuuseqarfiginissaat nukinginnarsivoq, Sara Olsvig oqarpoq.
