Pinerluttut katsorsartittarnissaat piumasaraa
Kalaallit qallunaat parnaarussiviiniittut ikiaroornartumik imigassamillu atornerluisut katsorsarneqarnissamik neqeroorfigineqartarput, taakkua katsorsarneqartarnerat kalaallit oqaasii atorlugit kalaallinit katsorsaasunit suliarineqartarpoq.
Periarfissaq tamanna Kalaallit Nunaanni pineqaatissinneqarsimasunut inissiisarfinni atortinneqanngilaq.
Tamannalu pissutigalugu Lars-Emil Johansenip qallunaat naalagaaffiat kaammattorpaa Kalaallit Nunaannut atuutsileqqullugu.
Periarfissaq tamanna ukiut arlaqartut matuma siornatigut Lars-Emil Johansenip suliniuteqarneratigut atuutsinneqalerpoq, isumaginninnikkut suliniutinut aningaasaliissutigineqartut atorlugit.
Suliniutigineqartut iluatsilluarsimapput. Atornerluisut katsorsarneqarnermikkut atorluisuujunnaarput, tamatumalu kingorna inuiaqatigiinnut akuleruttarlutik.
Periarfissap tamatuma Kalaallit Nunaani piaartumik atuutsinneqalernissaa pisariaqartoq, Lars-Emil Johansen isumaqarpoq.
- Danskit naalagaaffiata eqqartuussiveqarneq suli oqartussaaffigaa, taamaattumik periarfissap tamatuma Kalaallit Nunaannut atortinneqannginera kukkunertut isigaara, Lars-Emil Johansen oqarpoq.
- Danmarkimi parnaarussivimmi misilittakkat ajunngitsunik kinguneqartut, Kalaallit Nunaanni atorneqarsinnaapput, Lars-Emil Johansen danskit inatsiseqarnermut ministeriannut Lars Barfoed-imut saaffinissutimini tamaatut allappoq.