Pinerluttut aamma ullorsiorniarput
Parnaarussiviup pisortaata Hans Jørgen Engbop oqaatigaa, parnaarussiviup oqaluttuarisaanerani ukiormanna siullerpaamik kalaallit erfalasuat amuneqassasoq.
Ulluni erfalasoqarfiusussatut aalajangiussani, siunissami erfalasulerfiit marluk atorlugit erfalatsertoqartassaaq, tassa kalaallit qallunaallu erfalasui amuneqartassagamik.
- Kalaallit erfalasuat Kalaallit Nunaannit nammineerlunga nassataraara, sapaatimmi akunneri arlaqanngitsut matuma siornagut Kalaallit Nunaanniikkama. Parnaarussivimmik ingerlatsinitsinni nutaaliorluta, kalaallit parnaarussat "inuiattut misigisimanerat" ataqqiniarlugu taama iliuuseqarniarpugut. Tassami parnaarussivik kalaallinut pinerluuteqarsimasunut aamma sullissiviummat, tamatuma pisortatigoortumik erfalasulerfissani takuneqarsinnaanissaa pissusissamisoorsorigatsigu.
Juunip 21-anni ualikkut sisamanut parnaarussat aneertarfimminni aneernerannut atatillugu erfalatsertoqassaaq.