Pinerluttunik Danmarkiliartitsisarneq taamaatilerpoq
Sakkortuumik inatsisinik unioqqutitsisimasut, 2015-imi januaarip aallaqqaataaniit pillarneqarnertik nunatsinni parnaarussaassutigisalissavaat. Tassa ullumikkutut Herstedvesterimiunngitsoq.
- Nuannaarutigigaarpara qangali eqqarsaataasimasoq maanna piviusunngortinneqalermat, iluatsinnissamut maanna alloriarpugut, tamannalu nipaatsumik nuannaarutigaara. Københavnimi Kalaallit Illuutaanni pisortaq, Inger Bruun oqarpoq.
Herstedvesterimi parnaarussanut 16-usunut, kalaallit ikorfartuisut Kalaallit Illuutaannit isumagineqartarpoq. Herstedvesterimi parnaarussat killiligaanngitsumik inissitaasarput.
Pinerlussimasunik Danmarkimut aallartitsisarneq, Kalaallit Nunaata Danmarkillu inuup pisinnaatitaaffiinik unioqqutitsisarneri qangali uparuarneqartarput.
Kalaallit Nunaanni matoqqasumik parnaarussiveqalernissamut pilersaarut qanilliallaqqimmat, Danmarkimi Amnesty Internationalip nuannaarutigeqaa. Amnesty Internationalip Danmarkimi eqqartuussisuserisuata, Klaus Hjulip ullumikkut pissutsit ima oqaluttuarai:
- Assersuunneqarsinnaavoq, danskit pinerluuteqarsimasut Hvide Ruslandimi imaluunniit Amerikami kujallermi parnaarussivinni pinerluutigisimasatik parnaarussaassutigisartuuppatigit, kulturertik avatangiisertillu qimallugu - tamanna pillaatip qaavatigut pillaataavoq.
Nunaminni parnaarunneqartarneq kalaallinut pinerluuteqarsimasunut oqinnerugaalissasoq, Københavnimi Kalaallit Illuutaanni pisortaq Inger Bruun isumaqarpoq.
- Nunamit qimaatinneqarsimasutut aamma inuiaqatinit ajattugaasutut misigisimaneq peerutissapput, nunaminni parnaarunneqartalerunik. Pinerlunnermi pineqaatissinneqarneq qaangiuppat inuiaqatigiinnut ilaatilernissaat oqinnerulissaaq, ullumikkutut pinnani, tassa Københavnimi inunnut akulerutitiinnartarlugit, DR taama ilanngutassiivoq.
Matoqqasumik parnaarussivissap toqqavissaanik nunagissaaneq 31 million koruuninik akeqassagatinneqarpoq. Danski naalagaaffiata, Namminersorlutik Oqartussat aamma Kommuneqarfik Sermersuupp akiligassaq taanna avissavaat.
