Pinerluttulerinermut inatsit nutaaq atuakkiarineqarpoq

Isatsineq persuttaanerua? Piniartup puisiminiutaanik tuniniaatitaq aningaasanik qimarngussisoq qanoq eqqartuussivimmit pillarneqassava? Inuiaqatigiinnik sullissisussanngorluni pineqaatissinneqarneq qanoq paasineqassava?

Tamakkua akissutissartaat Kalaallit Nunaanni pinerluttunik eqqartuussisarneq pillugu atuakkiami atuarneqarsinnaapput. Atuagaq Nunatsinni eqqartuussisarnermik ukiorpassuarni immikkut ilisimasalittut sulisimasumit, Leif Senholtimit atuakkiarineqarpoq. Atuagaq kikkunnilluunniit suut pinerlunnertut isigineqartarnerannik soqutiginnittunit atuarneqarsinnaasoq nassuiaatitalersugaavoq. Nunatsinni eqqartuussiveqarfik qanoq suleriaaseqarnersoq, pinerluuteqarsimasullu qanoq iliuuseqarfigineqartarnerat, atuakkami paasisaqarfigisinnaavatit. Inuiaqatigiit pillugit qaffasinnerusumik ilinniartunut atuagaq tulluartuuvoq.

Pinerluuteqarsimasut pillugit inatsit nutaaq eqqartuussiviillu pineqaatissiisarneri assersuusiorfigalugit, oqaatsit ulluinnarpalaartut atorlugit Leif Senholt atuakkiorsimavoq.

Taanna ukiut 25-t matuma siornatigut assingusumik atuakkiaqareerpoq. Nunatsinnili pinerluuteqartunut inatsit siorna januaarimi 2010-mi nutarterneqarmat, Leif Senholtip atuagaq nutarterlugu saqqummersikkini atuakkami siulequtsiussamini nassuiarpaa.

Atuagaq "Den grønlandske Kriminalret" Favn Forlag-imit saqqummersinneqarpoq.