Pinerluttulerinermut inatsisip nutarternera nuannaarutigaara

novembarip 30-at 2004 17:17

Meeqqanik kinguaassiutitigut atornerluisunik assiliinerup, filmiliornerup tamakkuninngalu siammarterinerup nunatsinni inerteqqutaalernera politimesterip Anders Linnetip nuannaarutigaa.

Meeqqanik kinguaassiutitigut atornerluinermut tunngasunik pinerluttulerinermut inatsimmiittoqareeraluarpoq, inatsilli assiliinermut filmiliornermut siammarterinermullu tunngasunik imaqanngimmat maanna nutarteriffigineqarpoq.

- Inatsisip nutarterneratigut suliassanngortitsinerit qanoq amerlatigisassanersut siulittuutigiuminaappoq, ikittuinnaanissaalli naatsorsuutigineqarpoq.

Meeqqat kinguaassiutitigut atornerlullugit assilineqartarnerannut filmiliarineqartarnerannullu tunngasunik nunat tamalaat pinerlussimasunik ujarlerneranni nunatsinni politiit peqataasarsimanngillat. Oqartussat aamma akuliussinnaasarsimanngillat kalaallit meerartaat kannguttaatsumik filmiliarineqarsimagaangata.