Pinerluttartut utikattarput
Nunatsinni pinerlussimasut marluugaangata aappaa ukiut tallimat qaangiunneratigut nutaamik pinerluuteqaqqittartoq, Kalaallit Nunaanni Naatsorsueqqissaartarfimmiit nalunaarusiarineqarpoq.
- Pinerluuteqareersimallutik pinerluuteqaqqittartut ukiumikkut assigiinngitsuupput, toqqaannartumik parnaarunneqarsimasinnaapput imaluunniit parnaarunneqannginnerminni allanik pinerluuteqareersuullutik nakkutigineqarlutilluunniit. Apeqqutaavoq naatsorsueqqissaartarfiup naatsorsugai sorliit pineqarnersut, taama oqarpoq, Nuummi isertitsivimmi ittuusoq Mikael Stage.
Taanna assersuuteqarluni sanilliussivoq, Danmarkimi parnaarussivimmut utikattartut 40 procentii nalinginnaasumik parnaarussaannginnerminni allanik assigiinngitsunik pinerluuteqaqattaareersimasuusut.
Tassa siullermeertumik parnaarussaannginnerminni allanik inupiluusereersimagajuttartut. Erseqqissaassutigaali soorunami pinavissumik siullermeertumik inupiluusertoqarsimappat soorunami parnaarussaassutigineqartartoq.
Kalaallit Nunaanni Naatsorsueqqissaartarfiup nalunaarusiaa naapertorlugu ukiut pingasut tallimalluunniit ingerlanerini tassa 1995-mi 1997-mi 1999-imilu nunatsinni parnaarussivimmut utikattut 49 procentiusimapput. Tassalu imaappoq, inuit marluugaangata aappaa nutaamik pinerluuteqarluni parnaarussaassuteqartartoq.
Mikael Stage aperaarput, kisitsit sualuginarnersoq.
- Kisitsit tupaallaatiginngilara, Mikael Stage oqarpoq.
Taanna nassuiaavoq, susassaqartut allat aamma paasititsiniaanermikkut pinaveersaartitsisaraluartut.
Inuit pinerlunnerup iluanut pulagaangamik tassanngaanniit anillaqqinneq ajulersarput, oqarpoq. Nangipporlu:
-Parnaarussaareersimagaangamik avatangiisit tassunga sammisut utikaffigineqalersarput.
Mikael Stage oqarpoq tamanna pinaveersimatinneqassappat ataasiinnarmik aqqutissaqarsorigini, tassalu katsorsartinnikkut pinaveersaartitsisulluunniit aqqutiginerisigut.
Taama oqarpoq, Nuummi isertitsiviup ittua Mikael Stage. Naatsersueqqissaartarfiup kisitsisai naapertorlugit ukiukinnerit utikannerusarsimapput, tassalu 15-iniit 34-t tungaannut ukiullit 61,7 procentii utikattarsimammata.
