Pinerluttaalisitsisut sinerissamiittut pitsaanerusumik tapersersorneqarsinnaalissasut
Peqatigiiffik Thin Blue Line Denmark pinerluttaalisitsisut, pinerluttaalisitsisullu sulinikut taakkulu ilaqutaat sulinerminni sakkortuumik aqqusaagaqarsimasut ikiorniarlugit tapersersorniarlugillu Nuummi siorna maajimi immikkoortortaqarfeqalerput.
Taakkulu Nuummi qaammatini qulingiluani immikkoortortaqarfeqareerlutik Air Greenland suleqatigalugu nunatsinni sinerissamut angalanerusinnaalerlutik facebookimi nittartakkaminni allapput:
- Peqatigiiffittut qujamasungaarpugut suleqatigiilernitsigut tatiginninnerat takusinnaagatsigu, aammattaarli ataatsimoorluta allannguilluarsinnaanerput takusinnaagatsigu, Thin Blue Linemi pisortaq Stinne Ølshøj oqarpoq.
Peqatigiiffik nammineq kajumissutsiminnik sulisunik sulisoqarpoq nunatsinni angallannerup akisunera pissutigalugu sinerissamut siornatigut angalanerusinnaanatik Stinne Ølshøj oqaluttuarpoq.
Kajumissutsimillu suliaqartut tapersersorniarlugit suleqatigiilersimallutik, Air Greenlandimi piujuartitsinermut attaveqaasersuutinullu pisortaq Inga Dora G. Markussen oqarpoq
- Nunatsinni angalaneq nalunngilarput akisuujusoq aamma makkua namminneq kajumissutsiminnik suliaqartartut taakkua peqatigiiffiit allallu amerlanerpaatigut immaqa aningaasat killeqarmata peqatigiiffitsik anngussinnaasai killeqarsinnaasarput., Inga Dora G. Markussen oqarpoq.
Sinerissami ikiuinissaq pingaaruteqartoq
Thin Blue Line Denmarkip misissuineq, nunatsinni politiit sisamararterutaasa sulinermit kingunerluuteqartualersimanerannik takutitsisoq siorna novembarimi saqqummiuppaa.
Maannamullu inuit 60-it ikiorniarlugit tapersersorniarlugillu attaveqarfigereerpaat.
- Kalaallit Nunaanni sivisuumik sulinngilagut, kisianni politiit, politiit ikiortaat Danmarkimiillu politiit ikiortaajartortut inuit 60-it siulliit kiisami attaveqarfigilerpavut, taanna taama oqarpoq.
Suliassaq allaanerusoq kattuffiup eqqumaffigaa, tapersersuinertimmi Kalaallit Nunaanni pissutsinut nalimmassartariaqartoq taassuma ilanngullugu oqaatigaa.
- Illoqarfinni allani nunaqarfinnilu ikiuinissarput tapersersuinissarpullu pingaaruteqartorujussuuvoq, Stinne Ølshøj oqarpoq nangillunilu.
- Politiit politiinut ikiortitut sulisut kommunefogedillu sumiiffimminni ilungersunarluinnartunik suliaqartartut ikiorneqarpiartannginnerallu nalunnginnatsigu. Taamaattumik illoqarfinnut minnernut nunaqarfinnullu angalassagutta taakkuninnga (Air Greenland aaqq.) ikiorneqarnissarput pisariaqartipparput, Stine Ølshøj oqarpoq.
