Pinerlunniat ullumikkut eqqissisimaarput

Inatsisartunut qinersinermi innuttaasut, pinerlunniallumi isumaqalersimagunarput ulloq sulinngiffittut atorniarlugu. Ulloq pisoqarfiunngingaarmat danskit taqqavani aallartitaat illoqarfissuarmi Johannesburgimi pinerlunniat najugannaavanni eqqissivilluni angalaarsimavoq.

Afrikap Kujataani naalagaaffimmi illoqarfissuup Johannesburgip immikkoortortaa Hillbrau pinerlunniat najugannaaraat.

Toqutsinerit, pinngitsaaliinerit tillinniarnerillu ulluinnarsiutaapput. Afrikap Kujataani naalagaaffimmi ukiumut sakkulerluni tillinniarnerit 126.000-usarput, arnat 36.000-init amerlanerusut pinngitsaalineqarlutik arneriffigineqartarput, ukiumullu inuit 19.000-it missingi toqunneqartarlutik.

Ullumili Hillbrau eqqissisimaarfiusimavoq. Illoqannginnersani ivikkani inuinnaat tupertorsimapput. Seqinnareqaaq, ilaqutariillu taquarlutik seqinnisaarrapput.

Danskit taqqavani aallartitaata Dan Frederiksenip oqaluttuaraa ulloq qinersiffik nuannaffiusimasoq. Oqaatigaalu ulluinnaasuuppat tamaanaqquunnaviarsimanani.

- Ulluinnarmi tamaanaqquutissaguma ullup qiterarnerani, seqinnarissumilu angalaassagaluarpunga, tunummut qiviallattaajutigalunga. Ullumikkulli inuit tamarmik nuannanneranni annilaangassutissaqarata Hillbrauimi angalaarpugut.

- Ajoraluartumik Afrikap Kujataani naalagaaffimmi pinerlunniartarnerit ajornartorsiutaanerpaapput. Taamaammallu partiit qinigassanngortittut tamarmik pinerlunniarnerit akiorneqarnissaannik qineqqusaaruteqarput.

Afrikap Kujataani naalagaaffimmi taasisinnaasut 23 millioniupput, naatsorsuutigineqarporlu amerlanersaat ullumi taasiartorsimassasut. Aqaguli Hillbrauimi ulluinnanngoqqissaaq.

Aap, ajoraluartumik....... Afrikap Kujataani naalagaaffimmi danskit aallartitaat Dan Frederiksen naggasiivoq.