Pinerlunnermik pitsaaliuneq pitsanngorsarniarneqalerpoq
Pinerlunnermik pitsaaliuineq Nunatsinni politimester Steen S. Thomsen-ip pitsaanerulersinniarpaa.
Pinerluttarnerup akiorniarneranut atatillugu isumaqatigiissitsiniarnerup atugaalersinnaanera pillugu tamanut ammasumik ataatsimiisitsinermi, Nunatta Atuagaateqarfiani ippassaq ingerlanneqartumi, Steen S. Thomsen oqarpoq, eqqartuussineqartinnagu pinerluttup pinerlineqartullu isumaqatigiisitsiniartarnissaat isumaqatiginagu.
- Imaassinnaavoq allatigut atorluarneqarsinnaasoq, Steen S. Thomsen oqarpoq.
Nunatsinni politiit ukiortaaq sioqqullugu aalajangersimapput, pinerlunnissamit pinaveersaartitsinermik ataqatigiissaarisuusussamik toqqaaniarlutik.
Taannalu maanna Danmarkimiippoq, Pinerlunnissamik Pinaveersaartitsinermik Siunnersuisooqatigiinni ilinniarluni.
- Kisianni qallunaatut ilinniartiinnarnagu pingaarteqaarput, ilinniarnini nammineerluni ilusilersussagaa. Tassa Kalaallit Nunaanni nammineq misilittakkani ajornartorsiutillu naammattoortakkani aallaavigissavai, nunatsinnit politimesteri Steen S. Thomsen oqaluttuarpoq. Taassumalu neriuutigaa, taamannak ilinniartitsinermikkut isumannillu nutaani pissarsinermikkut pitsaasumik sammivisseeqataasinnaassallutik.
Kisianni suliassaq politiit kisimik naammassisinnaanngikkaat Steen S. Thomsen-ip nassuerutigaa, pisortat suliffeqarfii amerlanerusut suleqataasariaqartut oqarluni.
- Assersuutigalugu persuttaasartut aammalu arneriniarluni pinerlunnerit amerlavallaarput, Danmarkimut assersuutissagutta. Kukkussuunga isumaqassaguma, politiit kisimik naammasisinnaagaat.
Taamaammat pisortat suliassaqarfiisa tamarmiullutik peqataanissaat pisariaqarpoq, Steen S. Thomsen oqarpoq.
Eqqartuussiveqarneq pillugu ataatsimiititaliarsuup innersuussutai Inatsisartut pingasunngorpat marsip arfineq pingajuani aappassaaneerutaasumik suliarissavaat. Pinerluttup pinerlisallu isumaqatigiisinniartarnissaat ataatsimiititaliarsuup aamma inassutiginngilaa.
Aaqqiagiinngissutit, inatsisinik attuisut, anigorniarlugit, eqqartuussiviit angunngikkaluarlugit allaanerusunik periusissarsiornermi, Isumakkeerfigeqatigiinneq pillugu soqutigisaqaqatigiit, ippassaq ataatsimiinnermik aaqqissuisuusut, peqataarusupput.
