Pinerlunnerit sakkortuut ernumanartoqartippai

Pinerluttulerinermi Inatsimmik unioqqutitsinerit 2010-mi ukiut siulianut naleqqiullutik ikinnerulaarsimapput. Politiinut suliassanngortitat 2009-mi 5251-ioriarlutik siorna 5348-simapput. Sakkortuumik pinerlunnerit amerlanerat politimesterip isumakulunnartippai.

Kalaallit Nunaanni politimesteri Bjørn Tegner Bay ima allappoq.

- Kisitsisit misissuataarlugit immikkut maluginiagassaavoq, sakkortuuliornerit politiinut nalunaarutigineqartut amerlavallaarujussuarnerit. Pinerlunnerit innuttaasut amerlassusaannut agguataaraanni, assersuutigalugu Danmarkimut naleqqiukkaanni, Kalaallit Nunaanni toqutsinerit 19-eriaammik amerlanerupput, persuttaanerit arfineq-marloriaammik amerlanerullutik aamma suliat kinguaassiuutitigut atornerluinermut tunngasut 16-eriaammik amerlanerullutik, politimesteri oqarpoq.

Pinerluttulerinermi Inatsit 2010-mi ukiup siulianut naleqqiullugu 97-inik amerlanerusunik unioqqutinneqarsimavoq.

- Tamakkiisumik isigissagaanni qaffaat angigisassanngikkaluarpoq, kisianni pinerlunnerit suuneri misissuataarlugit ernumaammernartut soqutiginartut arlaliupput, oqarpoq.

Pinngitsaaliinerit pinngitsaaleeriarnerillu siorna 159-iusimapput, 2009-mi 40-nik ikinnerullutik 119-iusut.

Angerlarsimaffinnut iserluni tillinniarnerit amerlisimapput, niuertarfinni tillinniarnerit ikileriarsimasut.

Illoqarfinni assigiinngitsuni pinerlunnerit aamma assigiinngeqaat.

Qaqortumi Ilulissanilu suliat politiinut isumagisassanngortitat amerleriarujussuarsimapput, killoq soorlu Paamiut, Maniitsoq aamma Tasiilaq/Illoqqortoormiut pinerlunnerit tungaatigut ikileriarujussuarfiusimasut.

Nuummi pinerlunnerit amerlassusaat taamaaginnarput.

Immikkut inatsisinik unioqqutitsinerit aamma amerleriarfiupput, soorlu aqqusinermi angallannermut aamma ikiaroornartulerinermut inatsit aamma aalisarnermut inatsit.

Taakkununnga tunngasut suliassat 1588-iusimariarlutik siorna 1917-inngorsimapput, 300-t sinnerlugit amerleriarsimallutik. Taakku amerlanersai angallannermut tunngapput, qularnanngilarlu inatsisip nutaap atuutilersinneranut amerleriaat tunngassuteqartoq.

Aalisarnermut tunngatillugu unioqqutitsinerit 23-niit 60-inngorsimapput, ilaatigut Kangilinnguani Sakkutooqarfik Namminersorlutillu Oqartussat suleqatigalugit suliarineqartut.

Politimesterip erseqqissaatigaa pinerluttulerinermi Inatsimmik unioqqutitsinerit amerlanerpaarpaartaat, soorlu sakkortuumik pinerlunnerit, aalakoornartutorsimanerup nalaani pisimasuummata.

- Nunatsinni Politiit 2010-mi angerlarsimaffinni eqqissiviilliornermut 3077-eriarlutik ornigussimapput. Meerartallit 442-simapput.

Aalakoorpallaat 1162-it aamma isumagisarialinnut ilaasimapput. Taamaammat imigassaq aalakoornartoq pinerluttulerinermut Inatsimmik unioqqutitsinernut pissutaaqataalluinnartutut taasariaqarpoq, Kalaallit Nunaanni Politimesteri tusagassiuutinut nalunaarummini allappoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat