Angut 30-t missaannik ukiulik sakkortuumik pinerluuteqarsimanini pillugu qaammatini arfineq-pingasuni pinerluuteqarsimasunut inissiisarfimmiittussanngorlugu Qasigiannguit Eqqartuussiviani pineqaatissinneqarpoq. Angut pinerluuteqartoq angutip 32-inik ukiullip angerlarsimaffianut unnuaannakkut isersimavoq, angullu toqunniarlugu sioorasaalersimallugu, sioorasaareeramiuk inussamigut saviminermik tilluummik sakkulerluni kiinaannaagut tillualersimavaa kilerujussuarlugu. Angut pinerluffigineqartoq napparsimmavimmi kingorna mersorneqartariaqarsimavoq. Angut persuttaasoq marsip pingajuanili tigummigallagaavoq. Pinerluuteqartoq isumaqarsimavoq angutip pinerluffigisami, politiinut eqqunngitsumik oqaatigisimagaani. -Angutip pasinniinnarluni taama sakkortutigisumik inoqammut iliornera eqqartuussisut sisamanngornermi marsip 24-ani nalilerpaat sakkortuumik pineqaatissiinermik kinguneqartariaqartutut, taamaammallu 30-t missaannik ukiulik qaammatini arfineq-pingasuni Pineqaatissinneqarsimasunut Inissiisarfimmiittussanngortillugu. - Sussuteqanngitsumut nakuusersimanera, inuuneranik sioorasaarisimanera angerlarsimaffianilu eqqissiviilliortitsisimanera pillugu taama aalajangiisoqarpoq. Unnerluussisoq illersuisorlu tamarmik pineqaatissiissummik akuersipput, Qasigiannguani politeeq Arne Sandgreen Reimer KNR-imut taama ilisimatitsivoq.
