Gentofte Kommunemi pisortaanerup Torben Frølichip Radio24syvimut oqaatigaa, Tasiilami kinguaassiutitigut pinerlunnerit annertuut allaaserineqaqattaareernerisa kingorna meeqqat Gentoftemiit Tasiilamut paarlaaqatigiinnikkut atuariartortut Tasiilami ilaqutariinni najugaqartarunnaassasut.Assi: Scanpix

Pinerliisoqartareersoq: Meeqqat Gentoftemeersut Tasiilami ilaqutariinni najugaqaqqissanngitsut

Tasiilami kinguaassiutitigut pinerlunnerit annertuut allaaserineqaqattaareernerisa kingorna Gentofte Kommunemit aalajangerneqarpoq meeqqat Gentoftemiit Tasiilamut paarlaaqatigiinnikkut atuariartortut Tasiilami ilaqutariinni najugaqartarunnaassasut.

Gentofte Kommunep Tasiilaq illoqarfittut ikinngutigaa, meeqqallu    5. klassemi atuartut 30-t missaat Gentoftemiit Tasiilamut ukiut tamaasa paarlaaqatigiinnikkut atuariartortarnerat 1990-imili atuutilerpoq.

Tasiilami ilaqutariinni najugaqartarput, tamannali taamaatinneqarpoq.

Tasiilami meeqqanut kinguaassiutitigut pinerlunnerit annertuut allaaserineqaqattaareernerisa kingorna Gentofte Kommunemit aalajangerneqarpoq meeqqat Gentoftemiit Tasiilamut paarlaaqatigiinnikkut atuariartortut Tasiilami ilaqutariinni najugaqartarunnaassasut, Gentofte Kommunemi pisortaaneq Torben Frølich Radio24syvimut taama oqarpoq.

- Ukiut kinguaassiutitigut pinerluttuliorfiusimanngitsut kingumut qiviarsinnaavagut. Pissutsilli tamakku soqutiginngitsuusaaginnarsinnaanngilavut. Tamanna naammalerpoq, pissutsillu taakkorpiaat tunngavigalugit oqartariaqarpugut atuariartortut Tasiilami ilaqutariinni najugaqartarnerat attatiinnarsinnaanngikkivut.

Vandrehjemmimi najugaqartalerataannaasut

Gentoftemiit Tasiilami atuariartortut – soorlu atuarfimmi vandrehjemmimiluunniit – najugaqatigiittalissapput, Gentofte Kommune taama nalunaarpoq.

Kalaallit Nunaanni Politiit nalunaarusiaanni septembarip aallaqqaataata missaani saqqummiussami allassimasut naapertorlugit Tasiilami pinerlunnerit politiinut 2014-imiit 2018-imut unnerluutigineqarsimasuni 191-it Tasiilami 3000-ngajannik inulimmi meeqqanut inuusuttunullu kinguaassiutitigut pinerluttuliornermut attuumassuteqarput.

Tasiilami meeqqat pingasuugaangata ataaseq kinguaassiutitigut pinerluttuliorfigineqarsimasuusartoq taamatuttaaq meeqqat marluugaangata ataaseq kommunimit isumaginninnikkut sullinneqartuusartoq DR-ip piviusulersaarusiaani "Byen hvor børn forsvinder"-imi upernaaq aallakaatinneqartumi sammineqarpoq.

AAMMA ATUARUK Danmarki 5,3 millioner koruuninik Tasiilamut tapiissuteqartoq

Paasissutissat tamakku Gentofte Kommunep qisuariarneranut tunngaviupput, Torben Frølich Radio24syvimut oqarpoq.

- Qisuariarnissatsinnut pingasunik periarfissaqarpugut. Isumakulunnerput pissutigalugu suleqatigiinnitsinnik taamaatitsinissarput siullertut, aappaattullu pissutsit tamakku soqutiginngitsuusaarlugit suleqatigiinnitsinnik nangitsinissarput kingullertullu naaperiaanissarput qisuariarnissatsinnut periarfissaraavut."

Aalajangerniarneq imaannaanngitsoq

Gentofte Kommunemit aalajangerpugut pingajuattut periarfissarput atussallutigu. Aalajangerniarnerpullu imaannaanngeqaaq, Gentofte Kommunimi pisortaaneq Torben Frølich Radio24syvimut oqarpoq.

AAMMA ATUARUK Martha Abelsen: Ikiuilertupallattartussat Tasiilamukaatipallassavagut

- Tamatumunnga atatillugu inuit suleqatigilluartuartarsimasatta tatigiutarsimasattalu toqqaannanngitsumik pasillerneqarnerannik kingunilimmik qisuariartariaqarsimanerput soorunami uggornarpoq.

Meeqqat Gentoftemeersut Tasiilamiinnerminni kinguaassiutitigut pinerluttuliorfigineqarsimanersut nuanniitsumilluunniit nalaatsisimanersut Gentofte Kommunep Kalaallit Nunaannilu Poliitiit Radio24syvimut ilisimasaqarfiginnginnerarpaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat