Pinerliiniat sillimaffigaat

septembarip 12-at 2005 17:02

Norgep avannaani sapaatip-akunnera kingulleq pinerliisoqariataarnissaanut annaassiniarnermik sungiusartoqarpoq. Inuit 4000-t sungiusartut akornanni nunatsinniit politi inspektør Ole Bolvig Hansen peqataavoq.

Piviusuusaartinneqarpoq takornariat umiarsuaat uuliamut tankersuarmut aporluni qaartoq. Taava taamaalimmat inuit sungiusartut 600-t missaanniittut immami annaassiniartuusaarput, politi inspektøri Ole Bolvig Hansen oqarpoq.

Taanna aperaarput, Norgemi sungiusarneq taanna, nunatsinni qanoq atorneqarsinnaanersoq.

Umiarsuarmik takornariat nunatsinnukartuartarput, soorunalumi maani umiarsuarnik taama ittunik qanoq ililluta annaassiniarsinnaanissatsinnik misilittagaqartariaqarpugut. Norgemi umiarsuaq misiligaatigisarput nunatsinnukartartut umiarsuit takornarianik ilaasullit assigeqaat, taamatulli aamma Norgemi avatangiisit nunatsinnut aamma eqqaanaqalutik, Ole Bolvig Hansen oqarpoq.

Taanna aamma aperaarput, nunatsinni taama annaassiniartoqassagaluarpat naammattumik annaassiniartoqarsinnaanersoq.

- Kalaallit Nunaanni taama atortorissaartigisoqanngilaq, assersuutigalugu takornariat angallataat inunnik 1000-inik ilaasulik ajutooraluarpat annaassiniarnissamut isumalluutissat naammannavianngillat. Oqassallunimi pissusissamisuunngilaq taama annertutigisumik ajutoortoqassagaluarpat naammattumik annaassiniartoqarsinnaasoq, Ole Bolvig Hansen oqarpoq.

Erseqqissaavoq, Namminersornerullutik Oqartussani annaassiniarnermut inatsit qanganitsersimaqimmat nutaamik inatsisiliortoqartoq.

- Maannakkut annaassiniarnermut inatsit atuuttoq 1959-imeersuuvoq, Ole Bolvig Hansen oqarpoq.

Taannattaaq isumaqarpoq, nunatsinni susassaqartut tamarmik annaassiniarnerup nutarteriffigineqarnissaanik eqqummaarittariaqaraluartut.