Pinerliiniat saassusseqattaarnerat eqqaaniarneqarpoq
Inuit qimuttuitsuni ilaasut pingasut inullu bussimi ilaasoq ataaseq taamani imminuutingalutik qaartimmata inuit 52-it ajunaarput.
DR-imi sulisoq Jakob Illeborg oqaluttuarpoq, Londonimi pinerliiniartoqarsimanera suli malunnartoq.
- Tuluit oqaluttuarisaaneranni nutaanermi Juulip arfineq-aappaat asseqanngilaq. Taamani tuluit musliimit qaartartumeerinerat inuiaqatigiinnik tulunnik aalassatsitsivoq.
Gillian Higgsimut tamanna soorlu ippassartut aamma ippoq, taannalu qimuttuitsunit kingullersaalluni anninneqarpoq. Misigissutsit qaffakaapput ullullu tamatuma kingorna pissutsit allanngorluinnarput, Gillian Higgs oqaluttuarpoq, taamanilu pinerliisoqarmat taassuma nissuni tamaasa annaavai.
Taamani 2005-imi primierministeri Tony Blair pinerliinianik akiuniarnermi assigiinngitsunik sukaterivoq. Pinerliiniatut pasineqartut unnerluussinertaqanngitsumik ulluni 26-ni tigummigallarneqarsinnaalerput, muslimillu eqimattakkuutaat nakkutigineri sakkortusineqarpoq. Ulloq manna tikillugu muslimit ingasattajaarniartut peqatigiiffii marluk suli nakkutigineqarput, pinerliiniarnerillu tassunga assigusut pinngitsoortinneqarput. Pinerliinermili eqqugaasut ilaqutaat isumaqarput saassussinnginnermi qisuariartoqarpiarsimannginnera naammaginanngitsuusoq.
Pinerliiniat marluk nakkutigineqarsimasut nalunngilarput, sulilu paasitinneqanngilagut pinerliinianut allanut attaveqartut ilisimaneqaraluartoq sooq qisuariartoqarsimannginnersoq, John Elffert oqarpoq.
Ukiut tallimat matuma siorna pinerliiniarnerup kingorna ajornartorsiortoqartaraluartoq oqaaseqartartut oqaatigaat Tuluit Nunaat inuiaqatigiinnit assigiinngitsunit innuttaqarnera ajunngitsoq, innuttaasullu assigiinngitsuullutik eqqissillutik inooqatigiissinnaanertik upperaat.
