Pinerliiniat nalunaarusiaat eqqumiitsoq

Vollsmose-mi Odense-p eqqaani peqqarniisaarnianut suliamut attuumassutilik nalunaarusiaq isertuussaq politiit paasiniaasartuinit suliaasimasoq aamma eqqumiitsumik nassaarineqarpoq.

Danmarks Radio-p pilersaarusiaq Vollsmose-mi peqqarniisaarnianik tiguakkanut attuumassutilik pissarsiarisimavaa. Pilersaarusiami tassani allassimapput kikkut qaammatip aallartinnerani tigusarineqassanersut. Pilersaarusiaq Buddinge-p qimutsuitsunut unittarfiata eqqaani politiit paasiniaasartuisa qullersaqarfiata ungasinngisaani nassaarineqarpoq.

Pilersaarusiaq ilaatigut paasiniaasartut sulisuisa aqqinik imaqarpoq. Eqqumiinnerpaavorli tigusarineqartussat aqqi assammik allanneqarsimasut ilaammata, taamalu inuttut normui aamma ilaallutik. Tigusarineqartullu eqqartuunneqarnerat matoqqasumik ingerlanneqarmat kukkuneq annertugineqarpoq paasissutissat taama sukumiitigisut tamanut saqqummiunneqarmata.

Nassaarneq pivoq peqqarniisaarniat pillugit nalunaarusiaq alla København-imi aqqusiniinnarmi nassaarineqarnerata kinguninngua. Taanna Sillimanissamut aqutsisunit suliaavoq politiillu Odense-mi misissuinerminni kemikaliat nassaat suunerinik imaqarluni.