Pineqqatissiisarnerit sukannernerulerput

Angummik 23-nik ukiulimmik, inunnik marlunnik toqutsisimasumik ukiuni qulini parnaarussassanngortitsinerup takutippaa nunatsinni eqqartuussisoqartillugu pineqaatissiinerit ukiuni kingullerni sakkortusiartorsimasut. Taama isumaqarput

Nuummi politiini inatsisileritooq Søren Jæger, pinerluuteqarsimasullu isumagineqarneranni allaffimmi pisortaq Inger Kreutzmann.

-Taamani pinerluttaalisitsinermut inatsisiliormata inuup pissusai inuttullu atugarisai isiginerullugit pineqaatissiisoqartarpoq. Kisianni ullutsinni malunnarpoq suup pinerluutaanera aamma isiginiarneqalersoq, taannalu tunngavigalugu pineqaatissiisarneq sakkortuneruleriartortoq malunnarpoq.

Inger Kreutzmann isumaqarpoq inuiaqatigiittut ineriartorneq sakkortunersumik pineqaatisiisalernernut peqqutaaqataasoq. Sakkortuuliortoqarsimappat sakkortuumik pillaasarnissaq inuiaqatigiinnit piumasaqaataanerulerluni.

- Malunnarnerupput inuup inoqamminik annersaanera serlersaarnera imaluunnit navianartorsiortitsinera kiisalu uteqattartartunik pineqaatissiisarnerit sakkortuneruleriartortut.

Nunatsinni pinerluttaalisitsinermi inatsit malillugu sivisunerpaamik ukiuni qulini parnaarussisoqarsinnaavoq, Søren Jæger nassuiaavoq.

-23-nik ukiullup ukiuni qulini pineqaatissinneqarsimanera suliap immikkut isigineqarsimaneranik tunngaveqarpoq, Søren Jæger oqarpoq.

Angut pinerlunnermi nalaani eqqarsartaatsimigut ajoquteqarsimanngimmat Danmarkimi parnaarussassanngortinneqanngilaq.

Danmarkimimi eqqartuussaagaluaruni inuunini naallugu pineqaatinneqassagaluarpoq, nunatsinnili ukiut arfinillit qaangiunnerini misiligutaasumik iperagaasinnaatitaavoq.