Pineqaatissinneqarsimasut meeqqerisunngorsinnaapput

Nunatsinni meeqqanik atornerluiniartartut ajornaquteqanngitsumik atuarfinni, meeqqerivinni timersortarfinnilu sulisinnaapput, siornatigut pineqaatissinneqarsimagaluarunilluunniit. Meeqqanik kinguaassiuutitigut atornerluisartutut pineqaatissinneqarsimasut meeqqanik sullissinnginnissaannik inatsisiliortoqarnissaa Inatsisartut 2005-imi 2007-imilu akueralugu Naalakkersuisunut suliassanngortikkaluarpaat, maannamulli susoqanngilaq. Iliuuseqannginnera Atuarfik Samuel Kleinschmidtimi siulersuisuni siulittaasup Nûno Baadh Hansenip assut kusanaagaa:

-Isumaqarpunga angajoqqaat meeqqallu toqqissillutik pisortat ingerlataannukartitsisinnaajuartariaqartut, meeqqerivinnut atuarfinnullu. Toqqissisimassutissaat tassaavoq meeqqanik kinguaassiutitigut atornerluisartuunngitsumik meeqqap ornittagaata sulisoqarnissaa, Nûno Baadh Hansen oqarpoq, nangillunilu.

- Inatsiseqartariaqarpoq, meeqqeriviit atuarfiillu sulisortaassagunik pinerluuteqarsimannginnissaanik qulakkeerisumik, nangippoq.

- Uanga erneqarpunga, assersuutigalugu eqqarsaartitsisua meeqqanik kinguaassiutitigut atornerluisimalluni pineqaatissinneqarsimasuuppat toqqissisimanavianngilanga. Toqqissisisimanerussaangali atuarfiup sulisuni sulilertinnagit pineqaatissinneqarsimanersut paasiniaqqaartarpagu, tassa børneattest-imik taasartakkamik pilluni, oqarpoq.

Børneattest taasaq tassaavoq straffeattesti, politiinut saaffiginninnikkut pineqarsinnaasoq. Sulilerniarluni saaffiginnittup ukiuni kingullerni pineqaatissinneqarsimannginneranut uppernarsaataassaaq, meeqqanut kannguttaatsuliorfiginnissimannginneranik imaqartussaaq.

Danmarkimi børneattestinik pinngitsoorani piniaqqaartarnissaq 2005-imi atuutilersinneqarpoq. Taamanili nunatsinni atuutilersinnissaa inatsisartut marloriarlugu oqaluuseraat akueralugulu, sulili susoqanngilaq. Siumumeersup Doris Jakobsenip aalassassutigeqaa, namminermi meeqqerisup sulilinnginnerani paasissutissanik piniarsinnaaneq 2004-mili siunnersuutigamiuk.

- Naalakkersuisut kaammattorusuppakka taanna suliaq ingerlateqqissagaat, inuiaqatigiinni taamatut piumasaqaateqartalernissaq pisariaqarmat aamma siunnersuujtip taassuma Meeqqat atornerlugaasartut annikillisissinnaammagit, Doris Jakobsen oqarpoq.

Namminersornerullutik Oqartussani inatsisilerituup inatsisissamik siunnersuusiortussap sooq taamanili suliarineqarsimannginnera naluaa, suliarli 2007-imi aallartissimanerarlugu.

Kultureqarnermut, Ilinniartitaanermut, Ilisimatusarfimmut Ilageeqarnermullu Naalakkersuisoqarfimmiit Ilaqutariinnermut Peqqissutsimullu Naalakkersuisoqarfimmut ingerlateqqinneqarsimavoq, taakkulu uterteqqissimavaat. Allarpassuarnik suliassaqarsimaneq aamma patsisigineqarpoq, soorlu efterskoleqarnermut inatsit suliarineqartariaqarsimammat, inatsisileritooq nassuiaavoq.

- Tamanna utoqqatsissutissaanngilaq, Doris Jakobsen oqarpoq.

- Soorlu massakkut qinerseqqilerpugut suliarlu naammassisimanali. Taamaammat isumaqarpunga taamatut inatsisartut naalakkersuisullu tamarmiullutik imaqatigiissutiginikuusaat pinngitsooranik naammassineqartarnissaat qulakkeerneqartariaqartoq.

Doris Jakobsen Siumumeersoq sakkortuumik parteeqatiminut kaammattuisoq inatsisissaq saqqummiuteqqullugu.