Folketingimut qinersineq 2015 Pineqaatissinneqarsimasut inissiisarfiisa ajorneri danskit politikeriinit nassuerutigineqarpoq

Nunatsinni pineqaatissinneqarsimasunut inissiisarfiit pitsaajunnaarvissimasut pillugit, Folketingimi danskit ilaasortaatitaasa arlallit misissorneqarnissaat piumasaraat. Enhedlisten aamma Radikalet oqarput ajornartorsiut aaqqinneqartariaqartoq. Venstret oqarlutik pisoq pillugu ilisimasakikkamik maanna oqaaseqarsinnaanatik.

 

Tamanna pivoq, Nunatsinni Pinerluttulerinermi Isumaginnittoqarfiup pisortaata, inissiisarfinni pissutsit ajortut isornartorsioreeraalu.

 

Nunatsinni pineqaatissinneqarsimasunut inissiisarfiit ima ajortigaat allaat taakku Danmarkimi parnaarussivinnut naleqqiullutik ajornerujussuullutik. Tamannaannaanngilarli, pinerlussimasut pineqaatissinneqareerneranni taakku inuiaqatigiinnut peqataateqqilernissaat aamma ilanginnarneqartartoq, Ilisimatusarfimmi ilinnioartitsisoq pineqaatissinneqarsimasullu atugaat pillugit ilisimasalik, Annemette Nyborg Lauritzen isumaqarpoq.

 

Taassuma taamatullu Nunatsinni Pinerluttulerinermi Isumaginnittoqarfiup pisortaata, Hans Jørgen Engbop aamma isornartorsiuinerminni ilannguppaat, politiinit tigummigallagaasunut atugassarititaasut, soorlu mattusimaneqaannartarneri pineqaatissinneqarsimasunut inissiisarfinni sulisunut artukkiisartut. Tamannalu pillugu pisortap kissaatigaa, danskit Inatsiseqarneqa pillugu ministeriaqarfia aningaasanik amerlanernik aningaasaliisariaqaraluartoq.

 

Tamannalu Folketingimi danskit partiivisa ilaasortaatitaasa ilaannit tusarneqareersorlu taakku oqarput, namminneq aamma tamassuma aaqqinneqarnissaanut akisussaaffeqarlutik.

 

Inissiisarfiit pillugit isornartorsiuinerit tusareerlugit, Enhedslistenip inatsiseqarneq pillugu oqaaseqartartua, Pernille Skipper oqarpoq, pissutsit erngerluni aaqqinneqartariaqartut.

 

- Isornartorsiuineq paasilluarsinnaavara. Ilaasortanngoqqikkuma tamanna Inatsiseqarnermut ministerinngortumut erngerlunga suliakkiutigissavara,Pernille Skipper oqarpoq.

 

Kalaallit Nunaannut tunngasunut Radikalet oqaaseqartartuata, Helle Løvgreen Mølvigip ajortoqarnera nassuerutigaa oqarluni pissutsit ajortut aqqinneqarnissaat arriisaarunneqarpallaarsimasoq.

 

- Pissutsit tamakku qanoq aaqqinneqarnissaat pillugit kalaallit oqaloqatigineqartariaqarput. Maannakkorpiarli oqaatigisinnaanngilara suut sakkugalugit tamasssuma aaqqinneqarnissaa pissanersoq, tassami Danmarkimi naalakkersuisunngortussat qanoq inissitsiterneqarnissaat tassani apeqqutaalluinnarmat uangullu parteerput tamassumani qanoq sunniuteqartigissanersoq apeqqutaassalluni, Helle Løvgreen Mølvig oqarpoq.

 

Dansk Folkepartiip Inatsiseqarneq pillugu oqaaseqartartua, Peter Skaarup oqarpoq, amerlanernik aningaasaliinissaq eqqarsaatigalugu tamanna qimerloorneqassasoq.

 

- Pinerluttulerinermi Isumaginnittoqarfiup pisortaata taama isornartorsiuinini tunuarsimaarfigisariaqaraluapaa. Tassami taassuma pissutsit pitsaasuunissaannut akisussaasuuvoq. Pissutsillu ajorsimappata tamanna aaqqitassaraa. Taama qisuariarnera tupaallannarpoq tungitsinniillu qanoq iliuuseqarfifineqartariaqarluni, Peter Skaarup oqarpoq.

 

Venstret oqaaseqartartuat, Karsten Lauritzen sallaannerulluni oqarpoq, pissutsinut ilisimasani killeqarmata folketingimullu qinersinissamut ulloq ataasiinnanngormat paasissutissanik atuarnissaminut piffissaqarsimannginnami, qinersineq qaangiuppaat aatsaat oqaaseqarusulluni oqarluni.