Pineqaatissinneqarsimasunut isertitsisarfimmi nakuuserneq
Nuummi pinerluuteqarsimasunut inissiisarfimmut inissitat sisamat, inissitamut allamut peqqarniitsumik nakuusersimasut, politiinit unnerluutigineqarlutillu ulluni 14-ini tigummigallagassanngortitaapput.
Allattoq Elisa Isaksen
februaarip 19-at 2009 16:55
- Unnerluussinermut atatillugu inissiisarfimmut inissitat pineqaatissinneqarnerat unitsikkalarneqassaaq, taamaalillutalu inissitanit allanit immikkoortikkallarsinnaallutigik, politimesterip tullia Morten Nielsen oqarpoq.
- Unnerluussissummik piaakannersumik isummerfigineqassaaq, taamaattoqassappallu suut unnerluussissutigineqassanersut sukumiinerusumik nassuiaasersorneqassalluni, aatsaallu taama pisoqareerpat suliaq eqqartuussivimmut suliassanngortinneqassaaq, Morten Nielsen oqarpoq.
Pinerluuteqarsimasunut inissiisarfimmi sulisut inissitamut taama peqqarniitsigisumik nakuusertoqarsimanera ilisimasimanngilaat, pereermat aatsaat paasisimagamikku, taamaattumik angutit persuttaanerisa nalaani unitseriarsinnaasimanngilaat.
