Pineqaatissinneqarsimasunut inissiivinnut utaqqisut suli utaqqisariaqartussanngorput
Namminersorlunimi inatsit naapertorlugu pineqaatissinneqarsimasunut inissiiviit nunatsinniittut Danmarkimiittunut nallersuunnissaat pinerluuteqarsimasunut Isumaginnittoqarfiup akisussaaffigaa. Ukiorlumi manna Folketingimi ilaasortat nunatsinniimmata pineqaatissinneqarsimasunut inissiivinni pissutsit qanoq ajortiginersut namminneq isiminnik takugaluarmatigit Danmarkimi naalakkersuisut Konservativinit Liberal Alliance-miillu tapersersorneqarlutik isumaqatigiissusiorput, nunatpullu sumiginnagaasutut taasariaalluni.
Nunatsinnimi pineqaatissinneqarsimasunut inissiivinnut isertinneqarnissaminnut utaqqisut 300-juupput, tassa Danmarkimut pissutsit nuunneqartuuppata parnaarussaanissaminnut utaqqisut 30.000-iussagaluarput. Pissutsillumi taamaattut Danmarkimi atuuttuuppata sakkortuumik qisuariarrattoqassangaluartoq qularisassaanngilaq, Nunatsinnili Danmarkimiit ungaseqisumi pissutsit taamaammata nipituuliortoqanngerluinnarpoq.
- Imaanngilaq Kalaallit Nunaanni pissutsinut soqutigisaqannginnatta aningaasaliinerusimanngitsugut. Inatsisinimmi atuutsitsinissamut ministeriaqarfiup Namminersorlutik Oqartussat attaveqarfigillattaavaa, arlaatigullu aaqqiisoqarsinnaanera tassuunatigut ingerlanneqarsinnaalluarluni. Pinerluuteqarsimasunulli Isumaginnittoqarfiup ingerlanneqarnissaanut akissaqarpiannginnatta Kalaallit Nunaata tamanna aamma malugaa, Ole Hækkerup, Socialdemokratit Inatsisinik atuutsitsinissaq pillugu oqaaseqartartua taama tunngavilersuivoq.
Isumaqatigiinniarnerullumi nalaani illuatungiliuttuni partiit annersaata Venstremeersut siunniussanut isumaqataanatik tunuartitersimapput. Taakkumi Pinerluuteqarsimasunut Isumaginnittoqarfimmut aningaasaliissutissat isumaqatiginiutigineqarmata Kalaallit Nunaata sumiginnarneqarnera paasisinnaannginnerarpaat, naak Danmarkimi aningaasassaaleqineq aamma ilisimagaluaraat.
- Inatsisinik Atuutsitsinermut ministerip uagutsinnut nassuiaassinera naapertorlugu inissiiviugallartussat utaqqisut ikilisarneqarnerinut naammakkallarnerarpai. Inissinneqarnissaminnulli utaqqisut, aamma eqqartuussivinniit pineqaatissinneqarnissaminnut utaqqisut amerlavallaarujussuaqaat, tamannalu ajornartorsiutaavoq annertooq. Akissaqarluartuuguttami eqqartuussiviit salliutillugit pineqaatissinneqarsimasunut inissiivissat tunulliunnerussangaluarpavut. Isumaqatigiissusiortulli isumaat naapertorlugu aaqqiissutissat tigussaasut pitsaanersarisorisaat aaliangiuppaat, aningaasassaalatsisimanerallu qularisassaanani. Tamanna uggornaraluaqaaq, piviusulli taamaallutik, Karsten Lauritzen, partii Venstre-p inatsisinik atuutsitsinermut tunngasunik oqaaseqartartua knr.gl-imut taama naqissusiivoq.
Aamma IA sinnerlugu folketingimi ilaasortap Sara Olsvig-ip suliaq pillugu oqaaseqarusunngikkallarnerarpoq, suliamummi tunngasunik Folketing-p Kalaallit Nunaat pillugu ataatsimiititaliaanut apeqqutinik suli akineqanngitsunik nassiussuisimammat.
