Parnaarussiviup erinarsoqatigiivi Vridsløselille Statsfængselimi 2004-mi pilersinneqarput. Angutit qulit erinarsoqatigiinni ilaasortaasut ukiut parnaarussaaqqavigisimasaat katillugit 64-iupput.Assi: KNR

Pineqaatissinneqarsimasunut inissiisarfimmiittut pinerluttuusimasunit erinarsornermik ilinniartinneqartut

Pinerluttuusimasut qulit Nuummi Ilulissanilu pineqaatissinneqarsimasunut inissiisarfinnut sapaatit akunneranni uani pulaarput. Angutit taakku parnaarussiviup erinarsoqatigiivini ilaasortaasut nunatsinni pineqaatinneqarsimasunut inissiisarfimmiittut erinarsornermik ilinniartippaat.

- Inuit tusarnaartorisassavut ukkissiinnarnissaat annilaangaginerpaasimavarput. Tusarnaartuvulli tamarmik peqataalluarlutillu qiimapput. Uangattaaq qiimmappunga!

Erinarsoqatigiinni ilaasortaq, Jannik Vejgaard, nunatsinnut sapaatit akunneranni uani tikeraaqataasoq taama oqarpoq. Taassumalu erinarsoqatigiit immikkuullarissut tassa parnaarussiviup erinarsoqatigiivi - inunnik qulinik Danmarkimi siornatigut parnaarussaaqqasimasunik inuttallit - tikeraaqatigai.

Parnaarussiviup erinarsoqatigiivi Vridsløselille Statsfængselimi 2004-mi pilersinneqarput. Angutit qulit erinarsoqatigiinni ilaasortaasut ukiut parnaarussaaqqavigisimasaat katillugit 64-iupput. Namminneq erinarsuusiatik erinarsuusiallu allat nuannarineqarluartut qallunaatoortut tuluttoortullu parnaarussivimmi inuunermut tunngasut erinarsortarpaat. 

Erinarsoqatigiit Ilulissani Nuummilu pineqaatinneqarsimasunut inissiisarfinnut pulaarput, pulaarnerminnilu pineqaatinneqarsimasunut inissiisarfimmiittunut erinarsornermik ilinniartitsipput. Parnaarussiviup erinarsoqatigiivi pineqaatissinneqarsimasunut inissiisarfittaarsuarmi Nuummiittumi erinarsorlutik aallartimmata pineqaatinneqarsimasunut inissiisarfimmiittut ilaat qissaserpoq – Jannik Vejgaardilu tamanna pillugu assut killitsippoq:

Erinarsoqatigiinni peqataasarnikka pissutigerpiarlugit pinerluttuliortaleqqinnikuunngilanga.

- Erinarsoqatigiittarnivut inunnit killitsissutigineqartarmata misigisarpunga arlaatigut sunniuteqartarluta. Pineqaatinneqarsimasunut inissiisarfimmiittut erinasoqatigalugit nuannersorsuuvoq. Tamanna nuannaarutissiisarpoq, maluginiarparalu erinarsornitsinni qiimmattartut.

Neriuppugut tikeraarnerput pineqaatissinneqarsimasunut inissiisarfittaarsuarmi erinasoqatigiinnik pilersitsinermik kinguneqassasoq.

Matuersaatinik perpaluttunik tusaasaqarneq

Jannik Vejgaard ukiuni arfinilinni parnaarussaaqqanikuuvoq, parnaarussiviullu erinarsoqatigiivini maannamut ukiuni pingasuni ilaasortaavoq.

Jannik Vejgaardip parnaarussiviup erinarsoqatigiivi peqatigai

- Erinarsoqatigiinni ilaasortaasuusugut tamatta parnaarussaaqqanikuuvugut. Ilaasortaasuusugut tamatta nalunngilarput, matuersaatinik perpaluttunik tusaasaqarneq qanoq nuanniitsiginersoq iperagaanerlu qanoq misigisimanarnersoq. Oqaloqatigisinnaasanik naapitsilluni iluartorujussuusarpoq, taamaattumik erinarsoqatigiinni peqataasarnera nuannarisorujussuuara, Jannik Vejgaard oqarpoq.

- Erinarsoqatigiinnilu peqataasarnikka pissutigerpiarlugit pinerluttuliortaleqinnikuunngilanga. Maanna pilluarlunga sukataarlungalu inuuvunga ilinniakkamillu aallartitsinissannut kajumillunga.

- Erinarsoqatigiiulluta erinarsortakkavut parnaarussaaqqanermut, atugarliornermut, akisussaasutut misigisimanermut kanngusunnermullu tunngapput, taakkulu erinarsornerisigut pinerluttuliortarnerup atugarliornermik kinguneqartarnerata inuusuttuaqqanut oqariartuutigisarparput. 

- Parnaarussivimmiittuulluni allarujussuarmik eqqarsartaariaaseqarnartarpoq. Parnaarussat silarsuaat silarsuarnut allanut sanilliunneqarsinnaanngilaq, Jannik Vejgaard oqarpoq. 

- Ajorsitsaariffigineqartutut migisimagaanni ajornartorsiutit eqqartornagit nakuuserneq ileqquusarpoq. Parnaarussivimmi pilertortumik ajornartorsiortoqalertarpoq – inuit tattoqittarput, aamma ilaquttatik ikinngutitillu maqaasisarpaat. Taamaattumik puffajasoqartarpoq.

Angerlarsimaffeqanngitsoq pinerluttullu akornganniittoq

Jannik Vejgaard ukioq ataaseq matuma siorna iperagaavoq. Parnaarussiviullu erinarsoqatigiivini ilaasortaanera parnaarussatut inuunermiit kiffaanngissuseqarluni inuunermut ikaarsaariarnissannut iluaqutigaara, Jannik Vejgaard oqarpoq. 

- Ukioq ataaseq matuma siorna - tassa iperagaaqqammernerma kingorna – inissaaruttuunera pissutigalugu angerlarsimaffeqanngitsutut inuuvunga. Sakkortuunik ikiaroortartut pinerluttartullu akornganniippunga. Inuit tamakku akornganniilluni nipilersornermik ilinniartitsisunngornissamik anguniagaqarnissannut qiimaniapiloornartarmat akimmigarnartuusinartarpoq. Parnaarussiviulli erinarsoqatigiivini peqataasarpunga. Sapaatillu akunnerit naanerisa ilaanni Jyllandimiippugut, erinarsoqatigisartakkamalu taamanikkut qiimmassarluartuartarpaannga. Aalajangiusimanera atuarninnillu attassiinnarnera pillugit nersualaartarpaannga. Tamanna uannut assut iluaqutaavoq. Parnaarussiviup erinarsoqatigiivini inuunerma sinnerani ilaasortaassaanga!

Nunatsinni pineqaatissinneqarsimasunut inissiisarfinni erinarsoqatigiinnik qanittukkut pilersitsisoqarnissaanut ilimasunngillat, taamaakkaluartoq nunatsinnut tikeraanerminni nuannisarsimapput. 

- Arfersiorpugut. Inuuninni aatsaavissuaq misigaara. Alutorsaqaanga, aamma ilulianut. Ilulianillu aamma aatsaavissuaq takuvunga –  illoqarfissuarmi quleriinnik initalinnik inissiarpassuaqarfiusumi biilerpassuaqarfiusumilu najugaqarpunga. Inussiarnersorsuuvusi, Kalaallit Nunaannilu pinngortitaq alianaatsorsuuvoq. Allaat inuit siornatigut naapinnikuunngisaannarsimasatta angerlarsimaffimminnut qaaqquaasigut, Jannik Vejgaard oqarpoq.

Kalaallit Nunaannut tikeraarninni misigisanni nuannernerpaaq oqaatsit pingasut atorlugit nassuiassagukku oqaatsit sorliit atussagaluarpigit?

- Pisuunnguallaataasoq, tupaallaatissaq nuannersorlu – seqineq nuannarisorsuunngilara, taamaattumik nillernera oqorsaasertarneralu iluariinnarpakka.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat