- Taama kukkuluttortoqaqqissanngilaq. Tamanna akuersaarneqarsinnaanngitsoq ersarippoq, pisortaq oqarpoq.Assi: KNR

Pineqaatissinneqarsimasunut inissiisarfimmiittut kukkuluttornikkut aneqqusaasarsimasut

Maleruagassanik ularussineq Nuummi pineqaatissinneqarsimasunut inissiisarfimmiittut akuersissuteqaratik aneqqusaasarsimanerannik kinguneqarpoq. Tamanna akuerineqarsinnaanngitsoq, nunatsinni pinerluttunik isumaginnittoqarfiup pisortaa oqarpoq.

Pineqaatissinneqarsimasunut inissiisarfimmiittut akuersissuteqanngikkaluarlutik inuiaqatigiit akornanni angalaaginnarnissaminnut akuerisaasarsimapput.

Nuummimi pineqaatissinneqarsimasunut inissiisarfimmi matoqqasumiittunut maleruagassat aneqqusaanermut tunngasut ilisimaarineqarsimanngillat.

Nunatsinni pinerluttunik isumaginnittoqarfiup pisortaa naalagaaffiulluunniit unnerluussisua akuersissuteqarsimanngikkaluartut, pineqaatissinneqarsimasunut inissiisarfimmiittunik 41-riarluni maleruagassat aneqqusaanermut tunngasut unioqqutillugit aneertitsisoqartarsimavoq.

AAMMA ATUARUK MIO pineqaatissinneqarnissaminnut utaqqisut pillugit: Annilaarnaqaaq

Danskit inatsisinik atuutsitsinermut ministeriat, Nick Hækkerup, Folketingip nunatsinnut ataatsimiititaliaanut ilisimatitsissummini taama allappoq.

Nuummi pineqaatissinneqarsimasunut inissiisarfimmi aneqqusaanermut tunngatillugu kukkuluttortoqarnerata paasineqarnerata kingunerisaanik Pinerluttunik isumaginnittoqarfik misissuisitsivoq.

Misissuinermi kukkuluttornerit siorna septembarimi pisimasutut takutinneqarpoq.

KNR-ip Pinerluttunik isumaginnittoqarfiup pisortaa, Naaja Nathanielsen oqaloqatigaa. Taassuma pisimasoq ajuusaarutigaa inissiisarfiullu matoqqasortaaniittunut anisinnaanermut allanik malittarisassaqarnerata maluginiarneqanngitsoorsimaneranik pissuteqarnerarlugu.

- Taama kukkuluttortoqaqqissanngilaq. Tamanna akuersaarneqarsinnaanngitsoq ersarippoq, pisortaq oqarpoq.

Atornerluisoqarsimaneranut takussutissaqanngitsoq

Immikkut ittumik anisinnaatitsinerit 41-t tamarmik peqqinnissamut siunertalimmik aninerusimapput. Tassa imaappoq pineqaatissinneqarsimasut kigutileriffilianngikkunik napparsimmaviliartut nakkutilliisunik marlunnik ingerlaqatigineqartarput.

Immikkut anisinnaatitaanermut ingerlaqateqarnermi arlaatigut atornerluisoqarneranut takussutissaqanngitsoq Naaja Nathanielsenip paasissutissiissutigaa. Taamaakkaluartorli 41-riarluni anisoqarsimanera annertuallaartoq nassuerutigaa.

- Soorunami piffissaq taama sivisutigisoq ingerlasinnaasoq eqqarsaatersuutigivarput. Aamma ilinniartitsivugut. Ileqqutoqqat allanngortinniarnerat ajornakusoorpoq. Sulisorpassuarnut nutaanut aamma taamaassimasinnaavoq, Naaja Nathanielsen oqarpoq.

Allanik kukkuluttortoqarneranik ilisimasaqanngitsoq

Assingusumik kukkuluttortoqaqqinnginnissaa pissutigalugu nunatsinni pinerluttunik isumaginnittoqarfiup suliniutit assigiinngitsut aallartippai. Immikkut ittumik anisoqarnissaanut suliamik isumaginninnissamut najoqqutassanik nutaanik sanasoqarpoq. Malittarisassat sulisunut tamanut qasseeriarlugit erseqqissaatigineqarput.

- Paasisaqarniariarluta erngertumik iliuuseqarpugut. Ingerlatseriaatsip eqqortup qularutigineqannginnissaa isumagivarput. Inatsisilerituup atorfianik nutaamik pilersitsivugut, taamaalillutik qularutiginnilaaraluarunik inatsisinik isumaginninnissamut ilitsersuisussamillu peqarput, Naaja Nathanielsen oqarpoq.

AAMMA ATUARUK IA: Pineqaatissinneqarsimasunut inissiisarfissamik Kangerlussuarmi pilersitsisoqarlunilu singernequteqartoqartitsisalerli

Paasititsinermi pinerluttunik isumaginnittoqarfiup ingerlatseriaatsini allani assingusumik kukkuluttortoqarsimasinnaanera malugialeraa oqaatigineqarpoq.

Naaja Nathanielsenilli ilitseriaatsimi kukkuluttortoqarsimaneranik allamik misissuisoqarnersoq ilisimanngilaa, inatsiseqarnermullu ministereqarfik innersuussutigalugu.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat