Pineqaatissinneqarsimasunut inissiisarfik matussaaq
Inatsisinik atortitsinermut ministeri Lars Barfoed, Eqqartuussiveqarneq pillugu Folketingimi ataatsimiititaliamut taama ilisimatitsivoq.
Inissiisarfinni inissat 2011-p naajartornerani amerlineqassapput, taamaalilluni inissat taamanikkut 168-iussallutik.
- Nuummi parnaarussivissaq naammassippat inissat 180-iussapput, Lars Barfoed oqarpoq.
Lars Barfoedilli akissutaa Folketingimi ilaasortap, Inuit Ataqatigiinneersup, Sofia Rossenip, naammaginngilaa. Parnaarussivimmi nutaami inissat aqqaneq-marluk isertitsivimmiissimasunut aninissaminnut piareersartunut atorneqassapput:
- Uanga takusinnaasakka malillugit inissat taamaaginnassapput. Herstedvesterimi parnaarussat 20-t taamanikkut aamma Nunatsinnukartussaapput. Taamammat ullumikkumiit suli ilungersunarsinerussaaq, Sofia Rossen KNR-imut oqarpoq.
Pisariaqartitsineq ullumikkut annertoorujussuuvoq. Inuit 240-t pinerluuteqarsimasunut inissiisarfinnut pinissaminnut apriilimi utaqqipput. Kalaallit Nunaatalu eqqartuussisuuneqarfiani aamma eqqartuussivinni suliassat ukiup nikinnerani 1.500-it missaanniillutik.
