Assi: Kriminalforsorgen i Grønland

Pineqaatissinneqarsimasunut aningaasartuutit isumaqatigiinngissutaasut

Kalaallit Nuummi pineqaatissinneqarsimasunut isertitsivissamittussat napparsimalerpata, nakorsarnissaannut kikkut akiliissanersut Naalakkersuisut danskillu naalakkersuisuisa isumaqatigiinngissutigaat. Peqqissutsimut naalakkersuisoqarfik KNR-imut taama ilisimatitsivoq.

Kalaallit Danmarkimi pineqaatissinneqarsimasunut isertitsivimmi Herstedvesterimiittut pillugit siunnersuut Inatsisartut ukiakkut ataatsimiinneranni oqaluuserineqarpoq.

Siunnersuullu akuersissutigineqassappat, pineqaatissinneqarsimasut Nuummi pineqaatissinneqarsimasunut isertitsivittaassamut 2019-imi ammarneqarpat nuunneqarnissamik qinnuteqarsinnaassapput.

Pineqaatissinneqarsimasulli napparsimalissappata, nakorsarnissaat kikkunnit akilerneqassanersoq nunatsinni danmarkimilu oqartussat inatsisissatut siunnersuutip Inatsisartunit oqaluuserineqarneranut atatillugu isumaqatigiinngissutigaat.

AAMMA ATUARUK Herstedvesterimi isertitat pillaatissartik sumi atussanerlugu nammineq toqqassavaat

Pineqaatissinneqarsimasoq assersuutigalugu talini napisimappagu, imaluunniit nakorsaatitortussanngorpat, taassuma nakorsarneqarnissaa nunatta peqqinnissaqarfianit isumagineqassasoq, danskit naalakkersuisui isumaqarput.

Nunattali peqqinnissaqarfik 1992-imi akisussaaffigilermagu, pineqaatissinneqarsimasut nakorsarneqarnissaannut akiliinissaq ilanngullugu akisussaaffigilinngikkaa, Naalakkersuisut isumaqarput, taamaammallu pineqaatissinneqarsimasunut nakorsaanissamut aningaasanik immikkoortitsisoqarsimanngitsoq, peqqissutsimut naalakkersuisoqarfimmit ilisimatitsipput.

Inatsisinut atuutsitsinermut ministereqarfiup Naalakkersuisunit oqaatigineqartumut akissutissaa Naalakkersuisunit maanna utaqqivaat.

AAMMA ATUARUK Parnaarussiviliorneq kinguartooqqippoq

Pinerluttunik Isumaginnittoqarfimmut Naalakkersuisunullu oqaloqatiginnillutik inatsisinut atuutsitsinermut ministereqarfimmit KNR-imut uppernarsarpaat, annerusumilli paasissutissiinatik.

Pineqaatissinneqarsimasut nakorsarnissaat qanoq aningaasartuutaatigisarnersut KNR-imit danskit kalaallillu oqartussaasuinut paasiniaraluarparput, iluatsinnaguli.

Pineqaatissinneqarsimasulli nakorsarnissaat kikkunnit akilerneqartassanersoq Nuummi pineqaatissinneqarsimasunut isertitsivissap 2019-imi ammannginnerani paasineqareersimassasoq, nunatsinni Danmarkimilu oqartussat naatsorsuutigaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat