Pineqaatissiisarnerit sakkortusiartorput

Nunatsinni toqutsisoqarsimatillugu pineqaatissiisarnerit sakkortuneruleriartorput. Tamanna ilaatigut alianaqisumik Upernavimmi upernassaq toqutsisoqarnerata kingunerisaanik maannakkut pineqaatissiinerup takutippaa.

Upernaviup eqqartuussiviani tallimanngormat,

angut inuusuttoq 23-inik ukiulik ukiuni qulini nunatsinni pineqaatissinneqarsimasut inissiisarfianniittussanngortinneqarpoq.

Angut 23-inik ukiulik arnamik 26-inik ukiulimmik taassumalu qitornaanik arfinilinnik ukiulimmik Upernaviup nunaqarfittaasa ilaanni Kangersuatsiami ukioq manna maajip 14-inni toqutsivoq.

Upwernavimmi politiit ittuat Tom Ostermann oqarpoq, aatsaat taama sakkortutigisumik toqutsinermut atatillugu pineqaatissiisoqartoq.

- Siornatigut toqutsisimasut ukiut tallimat angullugit pineqaatissinneqartarluarput, massakkulli taama pineqaatissiinerup takutippaa pinerlunnernut isiginninneq aamma sakkortunerulersimasoq. Tom Ostermann nassuiaavoq.

Upernavimmi toqutsisimasoq pinerluttulerinermut inatsit naapertorlugu marloriaammik pillaatissinneqarpoq inunnik marlunnik toqutsisimanini pillugu.

Sakkortuumik pinerluuteqarsimasoqartillugu pineqaatissinneqartut aalajangersimasumik piffissaligaanngitsumik isertitsivimmiittussanngortinneqarsinnaapput, piffissallu ingerlanerani naliliisoqartarluni.