Pineqaatissiinerit sakkortunerusut

Nunatta Eqqartuussiviata ikiaroornartumik hashimik eqqussuisut pingasuusut ilaasa marluk pineqaatissinneqarnerat sakkortusivaa. Tamanna ilaannut tupaallaatigineqarpoq, kisianni

Torben Hyldgaardip illersuisuata, Jens Paulsenip eqqartuussinerup inernera oqimaaqatigiissaagaasoraa.

- Naatsumik oqaatigissagukku amigaataasoraara Torben Hyldgaardip pineqaatissinneqarnerani isertitsivimmiitinneqarnera ilanngullugu naatsorsorneqanngimmat.

Aamma pisarneq malinnagu pineqaatissinneqartunut illersuisunut aningaasartuutit tamaasa akiligassanngortinneqarput. Taamaattorli suliap ingerlanerani malunnarsivoq eqqartuussinerup inernera Nuup Eqqartuussiviani aalajangiinermit sakkortunerussasoq, Jens Paulsen oqarpoq.

Aputsiaq Davidsenip pineqaatissinneqarnera sukannernerulersinneqarpoq – tassa pinerluuteqarsimasunut inissiisarfiimitinneqarnissaa ukiup aappaata affaaniit marloriaatinngorlugu ukiunut pingasunut sivitsorneqarpoq. Tamanna illersuisuata Lissi Olsenip naatsorsuutigisimanngikkaluarpaa.

- Tamanna pakatsissutigeqaara. Tassami Nuup Eqqartuussiviani pineqaatissiissutigineqartumit ukiut aappaata affaanit Nunatta Eqqartuussiviani ukiunut pingasunut pineqaatissiinerup sivitsorneqarnera allannguinerujussuuvoq.

Naluara Aputsiap suna naatsorsuutigisimassagaluarneraa, kisianni uanga tamanna naatsorsuutigisimanngikkaluarpara, Lissi Olsen oqarpoq.

Naak Lissi Olsenip eqqartuussinerup inernera naammaginngikkaluaraa, unnerluussisoq Sune Ploug Sørensen eqqartuussinerup inerneranik naammagisimaarinnippoq.

- Unnerluussisutut eqqartuussinerup inernera naammagisimaarparput. Tassami Aputsiaq Davidsenip aamma Ivik Ostermannip pineqaatissinneqarneri sukannernerulersinneqarput, naak Torben Hyldgaardip pineqaatissinneqarnera sivitsorneqanngikkaluartoq.

Tassa oqaatigisavut pineqaatissiinermi isiginiarneqarsimapput tamannalu naammagisimaarparput. Suliarujussuarmi matumani misissueqqissaarnermi angusat naammagisimaarpavut, tassami pineqaatissinneqareerput aqqusinerni tuniniaasut, akunnermiliullutik tuniniaasartut maannalu tuniniaanermi tunuliaqutaasut pineqaatissinneqarput, Sune Ploug Sørensen oqarpoq.

Illersuisup Lissi Olsenip ajornartorsiutaasoraa unnerluutigineqartut kisimiitillugit parnaarusimaneqarnerat pineqaatissinneqarneranni isiginiarneqarsimanngimmat.

- Matumani eqqartuussiveqarnermut isiginninnera innarlerneqarpoq, Lissi Olsen oqarpoq.

Suliami matumani illersugaa Aputsiaq Davidsen ulluni 71-ini kisimiitillugu parnaarusimaneqarpoq, tamannalu pineqaatissinneqarneranut sunniuteqartinneqanngilaq.