Pinaveersartitsisoqartuaraluartoq naartuersittartut ikiliartunngillat

oktobarip 20-at 2005 14:42

Nunatsinni naartuersittartut amerlassusii ukiumiit ukiumut allanngugaarneq ajorput, nunanut allanut naleqqiullutik amerlavallaartuaannarlutik. Ukiut ingerlanerini pinaveersaartitsiniarnerit ingerlanneqartuaannarput mannali tikillugu nuna tamakkerlugu malunnaatilimmik ikileriartuutaanatik. Paarisami pisortaq Bodil Karlshøj Poulsen oqarpoq tamanna inuuneq pillugu isummertarnikkut ajornartorsiuteqarnermik peqquteqartoq.

- Pinaveersaartitsiniarluni sulianiarnerit assigiinngitsut nutaallu eqqarsaatigissagaanni naartuersittartut malunnaatilimmik ikiliartuutigisimanngilaat, pinaveersartitsiniarnermut paasititsiniaanernullu atortussat assigiinngitsut sinerissamut nassiussortuarpagut, paasisitsiniaanitsinnilu arnat inuusuttuaqqat inersimasullu oqaloqatigisarnerini qanoq iliornissatsinnut aamma pissarsiaqarfigisarsimavagut, peqqissaasut atuarfik atuakkat atugaaqqallu aqqutigalugit paasisitsiniaaneq ingerlanneqarpoq kisiannili naartuersitartut ikiliartuaarsimanngillat, Bodil Karlshøj Poulsen oqarpoq.

Naartuersittartut ikiliartunnginnerannik ajornartorsiummut inuuneq pillugu isummertarneq peqqutaaqataanerpaasoq Bodil Karlshøj Poulsen isumaqarpoq.

- Tamanna imminut namminerlu timimut qanoq isiginninnermik peqquteqarpoq aammali angutit arnallu akornanni pissutsinik peqquteqarluni. Naartulerneq naartuersinnerlu arnat angutillu tamarmik akisussaaffigaat, Bodil Karlshøj Polsen oqarpoq.

Neriuutiginerarpaa massakkut pinaveersaartitsilluni suliniarnerup siunissami naartuersittarnerit ikiliartortilerumaarai assersuutigaalu pinaveersaartitsilluni sulianiarnerit illoqarfiit ilaanni soorlu Qeqertarsuarmi Maniitsumilu angusaqarfiulluarsimasut, nuna tamakkerlugu suliniarnissami sakkussanik nutaanik aamma tunisisimasut.

Nunatsinni naartuersitut siorna 905-iusimapput.