Pinaveersaartitsinerit aallunneqarnerujussuusinnaapput
Hans Enoksenip isumaanik radioavisimi ullaaq issuaareernitsinni inatsisartuni ilaasortaq Kristian Jeremiassen, Atassummeersoq allappoq, akiliisitsisalernissaq nammineq isumaqatiginartikkini.
Isumaqarpoq akiliisitsinerit naartuersinnernut, naartunaveersaatinut, kinguaassiutitigut nappaateqalernermi iisartakkanut assigisaannullu tunngasuusinnaasut inuiaqatigiinnut akisussaaffimmik annerusumik tunisinermik kinguneqassasut.
Taamali isummerneq Maniitsumi peqqissaanermik siammarsaasup Karoline Olsenip isumaqatiginngilluinnarpaa:
- Uanga taama isumaqangilluinnarpunga, tassami isumaqarpunga pinaveersaartitsinerit allunnerujussuusinnaagigut. Imaassinnaavoq aamma ilisimasakinnerup pianik taamatut naartuersitttut neqeroorfigineqarpiarneq ajornertik imaluunniit paasissutissanik amigarpallaartunik tunineqartarnertik pillugu ilisimasaqanngitsut, Karoline Olsen oqarpoq.
Akiliisitsiniaqqaalertinnani pinaveersaartitsineq sukumiisoq nunatsinni misileqqaartariaqarsoraa. Aamma isumaqarpoq akit paasiniaqqissaartariaqartut.
- Politikkikkut akit peqqinnissaqarfimmi / naalakkersuisoqarfimmi naatsorsortariaqarput. Qanoq-una naartuersinneq akeqartoq? Aperaaq.
Karoline Olsen nammineerluni misissuinerigalui kinguneqarsimanngillat. Allaat Nuummut nakorsaanermut paasiniaasimagaluarluni. Kisitsisinilli peqartoqanngilaq.
- Isumaqarpunga akiliisitsitsiniarnermik oqalussagutta tamakku tanaasa nerriviup qaavanut qaqeqqaartariaqarivut, nangippoq.
Maniitsumi paasititsiniaanerujussuaq ingerlanneqarpoq.
- Imaanngilaq ukioq ataaseq ingerlateriarlutigu tassa isumakkiissagipput. Ataavartumik ingerlanngikkuni unittooqattaartuassaaq. Takusinnaavarput naartunaveersaatinut tunngatillugu paaqqutarinninngikkutta qaammatit pingasut qaangiuppata imaassinnaasoq naartuersinnerit qaffaqqittut, Karoline Olsen nassuiaavoq.
- Kisitsit qaffaqqittarpoq, paaqqutarineri unikaallatsikkutsigit, maani uppernarsereerparput.
Karoline Olsenip oqaatigaa Maniitsup peqqissaaviani ukiuni kingullerni pinaveersaartitsinermik sulinerminni naartuersinnerit siornatigut ukiumut 55-iusarsimariarlutik maanna 20-ngajannik ikileriarsimasut ukiumut 36-inngorsimallutik.
