Pinaveersaartitsineq pivallaarnagu inuuneq kusanartutut isigilertariaqarpoq
ICC-p Utqiagvikmi ataatsimeersuarnerata ullut pingajussaanni Inuit issittumi tamarmi peqqissutsikkut atugaat sammineqarput. Inuuniarnermi atukkat, nerisat pissutigalugit peqqiilliuutit, atornerluineq minnerunngitsumillu ukiorpassuanngortuni ajornartorsiutaasoq; imminortarneq oqillisigineqarput. Imminorneq issittumi tamarmi atugaasoq Inuit Issittormiut inuusuttaasa immikkut oqaluuseraat ullumilu oqallinnertik nangissallugu. Nunatsinni ICC-p inuussuttai imminortarnermut suliniuteqassamaartut ataatsimeersuaqataasoq Stine Berthelsen oqarpoq:
- Uagut Inuit Youth Internationaliminngaanniit SSSPK suleqatigalugu ulloq naallugu taamaallaat mobilikkut attavigineqarsinnaavugut, vagteqartarpugut, tassa imminorneq pinaveersaartinniarlugu taamatut sulisarpugut, Stine Berthelsen oqarpoq.
Taanna erseqqissaavoq septembarimiit imminorneq pillugu Paarisa suleqatigalugu saqqummiisussaallutik.
- Neriuppugut Katuaq suleqatigalugu saqqummiisinnaajumaarluta, takorloorparput sineriak tamaat attavigiumaarlutigu. Saqqumiinermi taallat, erinnat, isiginnaartitsinerit, oqallinnerit, allatulluunniit takutikkusutat saqqummiunneqassapput, oqarpoq.
Stine Berthelsen erseqqissaavoq ICC-mi inuusuttut ICYC-meersut ullumi oqaloqatigiikkamik nunanit peqataatitsisunit tamanit imminornerup pinaveersimatinnissaa suliniutiginiarneqartoq.
- Canada-miulli allatulaaq oqarput, taakku oqarput imatut pinaveersaartitsiniaratik taarsiulluguli inuuneq kusanartutut tunissutitut isigilerneqartariaqartoq, Stine Berthelsen oqarpoq.
Stine Berthelsen nunatsinni ICYC sinnerlugu ataatsimeersuarnermut aallartitanut ilaasoq aamma oqarpoq Canadami imminornermut pinaveersaartitsiniarluni massakkut suliniutaasut pillugit saqqummiussat suliniaqqinnissaminnut isumassarsiaqarfigilluarsimagitik, isumaqarporlu nunatsinni oqartussat suliniutinut amerlanerusunik aningaasaliissuteqartariaqaraluartut. Taamaattorli nunatsinni imminornermut pinaveersaartitsiniarluni ICYC-p SSPK suleqatigalugu oqarasuaatikkut oqaloqatiginnittarfiata normua ajoraluartumik eqqaamannginnerarpaa.
