Pilu Noahsen nammineq nuusiorpoq
Pilu Noahsen nipilersoqatigiinni Qarsukkunni, Nuutini aamma Aalukkunni tulleertutut peqataasarpoq. Vajgatip qitigiaasa nutarterlugit suliarineqarnerani 'Qullissara'-mi aamma pingaarnertut erinarsortooqataavoq.
Aasap ingerlanerani nammineq cd-liani immiussimavaa tassanilu erinnat amerlanersaat Juuna Zethsenimit Arctic Spirit-ikkunni siuttutut ilisimaneqartumit suliaapput. Nipilersoriaaseq rocki qitumaartoq qiimasoq atorlugu cd Atlantic Music aqqutigalugu saqqummersinneqarpoq.
- Nipilersoriaaseq taanna nammineq nuannareqaara. Nipilersoriaaseq rockiuvoq qiimasoq neriuppungalu tusarnaartunut pissittaartitsinnaasoq, Pilu Noahsen KNR.gl-mut oqarpoq.
Tallimanngornermi unnukkut Aalukkut tusarnaartitsineranni peqataavoq arfininngorpallu nammineq saqqummersitani Brugsenimi malunnartitsinikkut tamanut saqqummiutissallugu.
- Qangali angorusuttuarsimavara nammineq saqqummersitsinissara kiisamilu tamanna piviusunngorpoq, Pilu Noahsen oqarpoq.
Immiussami ingiortigai Juuna Zethsen aamma Adam Mike Kjeldsen kitaarertut, tumerparpaartuuvoq Aalut Zethsen Malik B. Andersen qatitoortuusoq.
- Erinnani taallat amerlanersaat inuunermut tassanilu naapitassanut tunngasuupput. Soorunami aamma asanninnilersaarumik ilaqarput, Pilu Noahsen oqarpoq.
Maannalu tusarnaartitsequsisunik tutsiuttoqarpoq. Kulturip illorsua nipilersoqatigiit marluk peqataaffigisaannik februarimi paarlersuarmi tusarnaartitsisitsiniarpoq.
