Pillakkat Danmarkimiiginnassapput
Kalaallit Herstedvesterimi paarnaarussat tassaniiginnarnissaat Danmarkimi pakatsissutigineqarpoq. Københavnimi Kalaallit Illuannit paarnaarussat illersuisuilu akisussaaffigineqarput, tassanilu pisortap Inger Bruunip naalakkersuinermik suliaqartut piumassusikinnerat pakatsissutigisarpaa.
- Aammaarlunga pakatsisinneqaqqippunga paasisinnaangakku ajornartorsiut aaqqinneqanngitsoraasiit, Løvstrædemi Kalaallit Illuannit Inger Bruun taama oqarpoq. Ukiut 30-t sinnerlugit Herstedvesterimi ajornartorsiutaasartut suleqataaffigivai. Ukiuni tallimani kingullerni Herstedvesterimi paarnaarussat amerleriarsimapput 20-nngorlutik illersuisullu aamma amerleriarsimallutik. Taakku amerleriarnerisa kingunerisaannik Kalaallit Illuanni sulisut suliassaat amerleriarput.
Nunatsinnit Danmarkimut piffissaligaanngitsumik paarnaarussisarneq killilersimaaniarlugu Kalaallit Nunaanni matoqqasumik paarnaarussiviliornissamik Nuummi isumasioqatigiinnermi aalajangertoqassasoq Inger Bruun-ip neriuutigaa. Isumasioqatigiittoqareersorli Inger Bruun neriulluarpallaanngilaq:
- Kalaallit danskillu naalakkersuinermik suliaqartut suliamik uannga attuerusunngitsutut isikkoqaraluartut uanga suliap killiffia ataatsimut isigalugu naammagisimaarpara.
Kalaallit Nunaanni matoqqasumik paarnaarussiviliortoqartariaqarpoq kiisalu inatsimmik allannguutissamik siunnersuusiortoqartariaqarluni maanga Danmarkimi paarnaarussiviliartitsisarneq taamaalilluni killilersimaarneqarsinnaavoq. Tamatuma kingorna takusinnaalissavarput qanorililuta Herstedvesterimi paarnaarussat Kalaallit Nunaannut angerlartinneqarsinnaanersut.
Taamatu oqassalluni annernaqaaq, nalunngilluinaratsigimmi kikkut Herstedvesterimi paarnaarussaaqqanersut aappaattuli taanna periarfissatuaringatsigu oqaatigisariaqarparput Herstedvesterimut paarnaarussat amerlinnginniassammata, Inger Bruun oqarpoq.
Københavnimi Kalaallit Illuanni pisortaq Inger Bruun taama oqarpoq. Kalaallit Illuata ukiup ataatsip ingerlanerani illersuisut 25-t sullitarpai, ukiunut tallimanut kingullernut naleqqiullugu marloriaammik amerlassusillit sullittarlugit. Danmarkimi tarnimikkut nappaatillit napparsimmavinni uninngasut aamma illersuisui taakkununnga ilaapput.
