Oqartussaasulli aalajangersumik neriorsuutigisinnaanngilaat 14-inik ukiullit inersimasut parnaarussiviiniittassanersut, imaluunniit naamik. Isumaginninnermut ministeqarfiup nalunaarusiaani tamanna ersertoq, nutaarsiassaqartitsivimmi Ritzauimi allaaseraat.
Inuusuttuaqqanut inuusuttunullu pinerluuteqarsimasunut Danmarkimi inissiisarfiit arfineq-marluk sulisui nalinginnarnik apersorneqarmata ersarissivoq taakku tamarmik inissaqartitsinngivissut. Inissiisarfinni taakkunani arfineq-marlunni inissat katillugit 131-upput. Nutaarsiassaqartitsiviup nalinginnarnik ullumi apersuinerata takutippaa utaqqisorpassuaqartoq.
Inuusuttunut inissiisarfiit inissaqartitsinngikkaangata, inuusuttut allatut ajornartumik inersimasut parnaarussiviinut oqartussaasut inissittariaqartarpaat.
Inuusuttunik 18-it inorlugit ukiulinnik parnaarussiviusartunut ilaavoq Vestre Fængsel, tassani inuusuttunut 18-it inorlugit ukiulinnut immikkoortortaliortariaqarsimapput.
- 18-it inorlugit ukiullit arfinillit massakkut tassaniipput. Tallimat inuusuttut inissiisarfiinut pinissaminnut utaqqipput, tamannali siunertaanngikkaluarpoq, taamaattariaqanngikkaluarporlu, Vestre Fængselimi inspektøri, Peter Vesterheden oqarpoq.
18-it sinnerlugit ukiullit kisimik inuunertik naallugu parnaarussaasinnaalissapput, taamaammat 14-inik ukiulik toqutsisimaguni ukiut inuuffigisimasani sinnerlugit pillarneqartassaaq, soorlu immaqa ukiuni 16-ini pillagaalluni.
Pillaatissinneqarsinnaanermut ukiut ammut killingat appartinneqarmat eqqartuussisunit, parnaarussivinni meeqqallu pillugit paasisimannilluartunit assorsuaq isornartorsiorneqaraluarpoq.