Pilittat suliarujussui naammassilerput
Issittumi Siunnersuisoqatigiit aallartitaat pilittat, ullut pingajussaa ataatsimiipput, maanna ataatsimeersuarnermi oqaluuserisassat pillugit isumaqatigiinniareersimalerlutik.
Nunanut allanut ministerit Nuummi Katuami ataatsimiinnermi peqataalernissaasa tungaanut oqaluuserisassat sorliit pilittanit isumaqatigiinniussutaanersut paasiniarparput.
Nunat arfineq pingasut Issuttumi Siunnersuisoqatigiinni ilaasortat pilittaasa aammalu nunat inoqqaavisa aallartitaasa, maanna ataatsimiinnermi oqaluuserineqartussat piareersaleruttorpaa kusassarlugillu.
Qallunaat Nunaata, Kalaallit Nunaata aamma Savilimmiormiut siulittaasuuneranni aallartitaasalu isumaqatigiinniarnermi qullersaat, Michael Zielmer-Johns tamanna pillugu ima oqarpoq:
- Isumaqatigiinniarnermi apeqqut annertooq ataaseq kisimi suli iluatsinneqanngilaq, tassalu Issittumi Siunnersuisoqatigiit qullersaqarfissaata nunami sorlermiissanera. Tassami nunat arfineq pingasut ilaasortaapput, nunallu arlallallit neqerooruteqarlutik, taakkulu tamarmik assigiinngitsunik isumaqarlutik, Michael Zielmer-Johns oqarpoq.
Ullut aappassaannik isumaqatigiinniassutaasut ilaat suli aalajangiiffigineqanngilaq, tassalu siullertut, Issittumi Siunnersuisoqatigiit qullersaqarfissaata illoqarfimmi sumi inissinneqarnissaa:
- Aalajangeeqataasinnaassuseqanngitsumik ataatsimeeqataanissaminnut kikkut aalajangersakkanut naammassinnissinnaappat? Uagullu tungitsinniit isumaqarpugut apeqqut tamannarpiaq pillugu maannangaaq aalajangerneqartariaqartoq kikkut peqataasalissanersut, allalli isumaqarput tamanna oqallisigineqaqqaartariaqartoq. Aalajangeeqataasinnaassuseqanngitsumik ilaasortaasinnaapput suliniaqatigiiffiit, taamaattumik piumasaqaatinik killeqartitsisoqartariaqartoq uagut isumaqarpugut, tassami avatangiisit pillugit suliniaqatigiiffiit ilaat Issittumi Siunnersuisoqatigiinni susassaqanngitsutut isigineqarsinnaammata, Michael Zielmer-Johns oqarpoq, taannalu nangilluni oqarpoq, isumaqatigiinngissutaasut aappaat, tassaasorlu Siunnersuisoqatigiinni alaatsinaattutut nunat kikkut peqataasinnaanerinut apeqqut:
- Ulluni kingullerni marlunni suliaraagut allakkat uppernarsaatit naammassineqarnissaat, taakku ilagaat qitiulluinnartumik aalajangigassat aammalu suliaralutigit ukiuni kingullerni marlunni suut anguneqarsimaneri pillugit nalunaarusiaq, taakkulu nunanut allanut ministerit isummerfigisassaraat. Taakku saniatigut suliaraagut Issittumi Siunnersuisoqatigiinni suleqatigiissitat assigiinngitsut suliarisimasaat nalunaarsussallutigit, Michael Zielmer-Johns naggasiivoq.
Taassuma ilanngullugu oqaatigaa Nuummi ataatsimiinnissaq pillugu ukiuni marlunni siulittaassuuffigisartik sinnerlugu sulisimaqalutik.
