Pilikki Kinameersoq atorlugu kakiuisoqartarnera nakorsaanerup mianersoqqussutigigaa

Nunatsinni ilinniarsimanngitsut kakiuinerannit kingunerluutinik takussutissaqarnera piffissami kingullermi paasineqarpoq.

Nunatsinni nakorsaanerup Henrik L. Larsenip tusagassiorfinnut nalunaaruteqarluni ilisimatitsissutigaa pilikki Kinameersoq internettikkut pisiarineqartoq atorneqarsimasoq kakiuinermillu piginnaasaqanngitsut kakiuisarsimasut.

Kinguneri amiilaarnartut

Tamanna annertuumik aseruuttoornernik, sapigaqarnermut ersiuteqalernermik amerluuteqalernermillu kinguneqarpoq. Eqqugaasut napparsimasunngoriataarput ataasiakkaallu anigugassarinngisaminnik ajoquteqalerlutik, nakorsaaneq allappoq.

Taamaammat kakiortinnginnermi tamatuma isumaliutigeqqissaarnissaa pissutissaqarluarpoq. Nakorsaanerlu arlalinnik siunnersuuteqarpoq:

• Kakiuisussat peqqissaarlutit toqqaruk, aqqa ilisimajuk eqqiluisaarnikkullu pissutsit ajunnginnerat tamatigullu meqqummik ataatsiartakkamik nutaamik aaqqatinillu atuisoqarnissaa qulakkeeruk. Kakiuisoq misilittagartuujussaaq ilinniarsimanngitssuussananilu – kakiuineq assassornikkut suliaavoq ilinniagassaq.
• Sapinngisamik annertuallaanngitsumik kakiortigit (kakiugaq annertusiartortillugu navianaataa annertusiartussaaq)
• Pilikki akikitsoq ”Kinablæk” imal. pilikkit ilisimaneqartut assilillugit pilikkiliaq atorlugu kakiorteqinak.
• Qalipaatit sakkortuut atorlugit kakiortinnerit ajornartorsiutitaqarnerusarput. Qalipaat aappalaartoq allanut naleqqiullugu sapigaqarnermut ersiuteqalersitsigajuppoq.
• Paffikkut singernikkullu, naggussat atornerisigut ammip tasitsaartarnera pissutigalugu ippiuuteqarfiugajuttuni, kakiortinnaveersaarit.
• Kakiortinnissat isumaliutigeqqissaaruk. Kakiugaq imaaliallaannaq peerneqarsinnaanngilaq. Inuunerpit sinnera attattuussaasariaqassavat.