Pilertortumik ikiuiniarnikkut annaassisoqartarpoq
Nakorsat peqqissaasullu ilaatigut Sisimiuneersut, Ilulissaneersut Tasiilameersullu ulluni marlunnik atuagarsorlutillu sungiusarput. Ilikkakkatik suliffimminnut nassassavaat tassanilu allanik ilinniartitsinissaminnut periarfissaqassallutik.
-Pikkorilluinnartunik ilitsersuisoqarpugut, aamma pikkorissaarnerup ingerlanissaata pilersaarusiorluagaanera ersarilluinnarpoq. Pilertortumik pisoqartillugu, soorlu uummammik unittoortoqartillugu iliuuseqarnissatsinnut tamatta pikkorinnerulerpugut, Malene F. Andersen, ulluinnarni SANA-mi nakorsatut sulisoq oqarpoq.
Pikkorissaanermi atortussat maleqqissaarneqarput ajornartorsiornernilu assigiinngitsuni qanoq periaaseqartoqarnissaanik, nakorsaatit suut atornissaannik qanorlu katsorsaasoqarnissaanik ilinniartinneqarput. Peqataasut ulluni marlunni pikkorissareerlutik ilinniakkamik piviusumi atornissaannut sakkussaqarlualerput.
-Assigiinngitsunik pisoqartillugu qanoq pilertortumik iliuuseqarnissamut sungiusarneqarnitsigut, ingerlaannaq qanoq iluuseqarnissatsinnut pikkorinnerulerpugut. Sungiusimanngisatsinnik pisoqartillugu nangaasinnaanerput peerparput. Ingerlaannaq periarsinnaanngorpugut, tamannalu sulinitsinni inuunermik annaassissutaassaaq, Malene F. Andersen oqarpoq.
