Tunumi inuussutissarsiutitigut ineriartortitsinissaq ulluni makkunani qitiutinneqarpoq.
Ineqarnermut, attaveqarnermullu naalakkersuisoq, Jens Napaattooq, aalisarnermut piniarnermullu naalakkersuisoq, Rasmus Frederiksen, sisamanngormat Illoqqortoormiuniipput, maannakkullu Tasiilamiillutik. Tassani takornariaqartitsinermik suliallit isumasioqatigiinneranni peqataapput.
Sisamanngormat Illoqqortoormiut innuttaasa ataatsimeeqatigineqarput, innuttaasut 50-t najuuffigisaannik.
Pilersuisoq A/S-ip Illoqqortoormiuni immikkoortortaani pisortap, Erling Madsenip, ataatsimiisitsineq najuuffigaa:
- Illoqqortoormiut siunissaa pillugu naalakkersuisut qanoq oqaaseqassanersut tusaaniarlugu ataatsimiigiarpunga. Uagut nammineq nassuerutigereerparput piniartutut ingerlannarsinnaanata. Ukiuni kingullerni pingasuni-sisamani piniarnerup ingerlanerliornera malugisimavarput. Upernaakkut aasakkullu aningaasat kaaviaartitagut annikilleriarsimapput, Erling Madsen nassuiaavoq.
Naalakkersuisut ajornartorsiut aaqqiiviginiarlugu maanna iliuuseqarniarnerat, Erling Madsenip iluaraa.
