Pilersuisoq sumulluunniit nioqqutissarsiorsinnaalerpoq

novembarip 25-at 2004 14:22

Ullaakkorsiutit canadameersut angisoorsuarnik puullit. Tamakkuusinnaapput Pilersuisup pisiniarfiini pisisartunut qanittukkut nutaarsiassaalersussat.

Unammillernermi Ataatsimiititaliap suliniuteqarneratigut Pilersuisoq pinngitsoorani Pisiffik aqqutigalugu nioqqutissanik pisiniartariaaruppoq,

Dagrofammi Pilersuisoq pisinnaatilerpaa nammineq aalajangikkaminik allami nioqqutissanik pisiniarnissaanut. Tamannalu Pilersuisumi iluarisimaarneqarpoq.

- Tuniniaasartunik allanik suleqatissarsiorsinnaalerpugut, aammali Pisiffik kisiat suleqatigisinnaavarput, taamaalilluta nukittunerulluta ilaatigut akikilliliissutit takoqqusaarutillu pitsaanerusut pigiinnarumallugit, Pilersuisup pisortaa Gerhardt Petersen oqarpoq.

Canada niueqatissatut qissimillattaarneqalereersoq Gerhardt Petersenip oqaatigaa, erseqqissaatigaali suli isumaqatigiissuteqartoqanngimmat.

Pilersuisup allanut pisiniarsinnaalerneranut tunngatillugu ajuusaarutigaarput ippassaq unnukkut radioavisimi Pilersuisoq Pisiffillu paarlaakkatsigit. Unammillernermut Ataatsimiitaliap Dagrofamut isumaqatigiinniarneratigut Pilersuisup nioqqutissanik pisiniarnermini Pisiffimmut qilersugaanera atorunnaarpoq.