Pilersuisoq pisortartaartoq

Pilersuisumi pisiniartarnermut ussassaarinermullu ukioq kingulleq tikillugu pisortaasimasoq Niels Andersen, 39-nik ukiulik, Pilersuisumi pisortanngortussanngorpoq. Pilersuisoq tusagassiuutinut nalunaarummi taama allaaserisaqarpoq.

Niels Andersen Pisiffiup iluani 2007-imili qaffasissunik assigiinngitsunik atorfeqarsimavoq, niuertarfinnilu niuernermik ukiuni kingullerni 24-ni suliaqarsimalluni. Kvickly aamma ISO Supermarked taakkununnga ilaapput.

AAMMA ATUARUK Pilersuisoq pisiniarfiutiminik nutarterisoq

Niels Andersen niuernermik ilinniarsimasuuvoq, niuertarfinnut immikkut sammisumik Akademi-økonomitut, aqutsinerlu pillugu HD-mik taaneqartartumik ilinniaqqissimalluni.

Niels Andersenip Pilersuisumi pisortanngortussanngornera KNI A/S-ip pisortaanerata Peter Grønvold Samuelsenip nuannaarutigaa:

- Nalorninaatsumik Niels Andersen qinerparput, atorfiup imarisaanut unammilligassartaanullu piukkunnarnerpaamik piginnaaneqarmat, misilittagaqarmat, sakkussaqarmat. Inuiaqatigiinnut kalaallinut paasisimasaqarnera ataqqinninneralu nalilersuinitsinni pingaarutilimmik isumaqartissimavagut, KNI A/S-ip pisortaanera Peter Grønvold Samuelsen ilaatigut oqarpoq.

Pilersuisoq 66-inik pisiniarfiuteqarpoq, 600-llu missaanni sulisoqarluni.

Niels Andersen Pilersuisumi atorfittaamini ukioq manna maajip aallaqqaataani aallartissaaq.