Pilersuisoq nutarsarneqalerpoq

Internetikkut niuerneq kaaviaartitallu annertusarnerisigut, nunaqarfinni innuttaasut nioqqutissanik akikinnerusunik neqeroorfigineqarnissaat qulakkeerniarneqassaaq, KNR-mit nalunaarutigineqarpoq, aamma sullissineq pitsaanerusoq akillu appasinnerusutut neriorsuutigineqarput.
Allattoq Simon Uldum
maajip 21-at 2013 12:41

Nunaqarfinni niuertartunut nuannersumik nutaarsiassaqalerpoq. KNI-p pisortaanera Pilersuisup pisiniarfiisa piffissamut naleqqussarneqarnissaannut pilersaarutip saqqummiunneqarneranut atatillugu neriorsuuterpassuaqarpoq.

- Ilinniartitaaneq, nioqqutissanik ulluinnarni atorneqartartunik akikinnerusunik nioqquteqalerneq aamma pisisartut pitsaanerusumik misigisaqartarnissaat KNI-mi iliuusissat ilagaat, inuiaqatigiinni tamanut iluaqutaasussat," taamak oqarpoq pisortaaneq Claus Jensen siunissami KNI pillugu. Sulisut nunani allani pisiniarfiutillit pitsaanerpaat sulisutulli pikkoritsigilissapput.

KNIp pisortaanerata Claus Jensenip millionit marlunnik kisitsisitallit ukiumi naatsorsuiffiusumi nutaami missingersuutini immikkoortippai, taakku suliffeqarfissuup sulisuinut 1.000-inut ilinniagaqarnissamut aamma ilikkagaqarnissamik ingerlatsinernut atorneqassapput.
 

Tamanna pivoq, nunani assingusuni suliffeqarfinnut angisuunut aamma sammisaqarfinnut sanilliussilluni KNIp "nutarterneqarnissaata pisariaqarnera" isiginiarlugu, KNI-mit tamanna paasissutissiissutigineqarpoq.

- KNI-p oqaluttuarisaanerani immaqa allanngortitsinerit annersaat aallartipparput. Tamatumunnga pissutaasoq erseqqilluinnarpoq: Claus Jensen naapertorlugu niuertarfinni assigiinngitsuni kaaviaartitserup annertusarneratigut nioqqutissanik akikillisaataasinnaavoq.

- Aningaasartuutigut arlallit aalajangersimasuupput. Taamaattumik nioqqutigisamik ataatsimik tunisaqarnerusinnaagutta taava taassuma ataatsip akia apparsinnaavoq. Taakku imminnut ataqatigiinnerat paasissagaanni ilinniartitaaneq aamma ilikkagaqarnissaq pisariaqarpoq. Taamatuttaaq pingaaruteqartorujussuuvoq pisisartut internetikkut pisiniartarfitsinni pisisa.gl-imi pisiniarniartut, tamatuminnga ikiorneqarsinnaanerat Pilersuisup pisiniarfiini tamani," Claus Jensen oqarpoq.