Pilersuisoq niuertumut saaffiginneqqusivoq
- Aleqa Hammond pisiniarfimmiikkuni isumaqarlunilu nioqqutissanik amigaateqartoqartoq, taava niuertumik oqaloqateqartariaqarpoq suaartaatigiinnarnagu Ilaqutariit Kalaallit sunik tamanik amigaateqartut, pisiniarfinnut pisortaq, Frederik Olsen Sermitsiamut ullumi saqqummersumut taama oqarpoq.
Kullorsuup nioqqutissanik pisariaqartinneqartunik upernaaq manna qaammatini arlaqartuni amigaateqarsimanera Pilersuisumit nassuerutigineqarpoq.
- Inuttut kukkuluttortoqarsimavoq tamaaliortoqaqqinissaalu pinaveersaassavarput. Tassungalu atatillugu pisinarfinni nioqqutissanik pisariaqartinneqartunik peqarnissaa pillugu qullersaqarfitsinni akisussaaffeqarnerput qulakkiissavarput, Frederik Olsen oqarpoq ilisimatitsissutigalugulu nunaqarfimmiut pisut pillugit ataatsimiisinneqarsimasut.
Naalakkersuisut iliuuseqaqqullugit Aleqa Hammondip kaammattuuteqareernerata kingorna, IA-meersup Olga Poulsen Berthelsenip § 37 aqqutigalugu apeqquteqaataanut Attaveqaatinut Naalakkersuisoq Jens B. Frederiksen akissuteqarluni ilisimatisivoq, Namminersorlutik Oqartussat suliassaqarfimmi sullissinissamik isumaqatigiissutaat ukiut qulit ingerlaneranni 30 millioninik ikileriarlutik 37 millioniinnanngorsimasut.
Naak aningaasaliissutit ikilisimagaluartut KNI-mut piumasaqaatit annertoorujussusut Jens B. Frederiksenip naqissuserpaa, maluginiarsimavaalu Upernaviup eqqaani Pilersuisup pisiniarfiinut nioqqutissanik timmisartuusisoqarniarsimagaluartoq iluatsinngitsumilli.
Kiffartuussinissamik isumaqatigiissusiornissap ammasumik suliariumannittussarsiuunnissaa Naalakkersuisut isumaliutersuutigisimavaat, taammaattorli nioqqutissanik pilersuinissamut akiliutissaq qaffanneqartariaqassaaq imaluunniit aamma sullissinissamut piumasaqaatit annikillisariaqassasut aammattaaq Naalakkersuisumit oqaatigineqarpoq.
